.jpg)
.gif)
.gif)
म्याग्दी- जिल्लाको पश्चिमी क्षेत्रमा रहेका तीनवटा स्थानीय तहलाई सदरमुकाम बेनीबजारसँग जोड्ने बेनी-दरबाङ सडक मर्मत भएको छ।
.gif)
बर्खा रोकिएपछि सडकमा खसेको पहिरो पन्छाएर फराकिलो बनाएपछि बेनी-दरबाङ सडकमा यात्रुवाहक बस र मालवाहक सवारीसाधन सञ्चालन हुन थालेका छन्। पूर्वाधार विकास कार्यालयले फापरखेत, लाम्पाटा, पानाबगर र बांगेपहिरोमा सडक मर्मत गरेको जनाएको छ।
.gif)
.gif)
कार्यालयका सुपरभाइजर राम्जी आचार्यले बर्खा रोकिएपछि सडक मर्मत गरेर ठूला सवारीसाधन सञ्चालन गर्न मिल्ने बनाएको बताए। सडकमा पहिरो खसेर साँघुरिएको थियो। पहिरो पन्छाएर सडकलाई फराकिलो बनाएर दुईतर्फी सवारीसाधन सञ्चालन हुने बनाइएको सुपरभाइजर आचार्यले बताए।
धवलागिरि, मालिका र मंगला गाउँपालिकालाई सदरमुकाम बेनी बजारसँग जोड्ने २४ किलोमिटर दुरीको बेनी-दरबाङ सडकमा गत असारदेखि ठूला सवारीसाधन सञ्चालन हुन सकेका थिएनन्।
यो सडक बागलुङको तमानखोलाका बासिन्दाले पनि प्रयोग गर्छन्। पहिरो खसिरहने भएकाले बेनी-दरबाङ सडकको यात्रा कष्टपूर्ण र जोखिमयुक्त बनेको थियो। बर्खायाममा जीप, ट्याक्सी, माइक्रोबस, मोटरसाइकल र ट्रयाक्टर चलेका सडकमा मर्मत भएपछि बस तथा ट्रक सञ्चालन हुन थालेका छन्।
म्याग्दी मालिका यातायात प्रालिका सञ्चालक अर्जुन आचार्यले सडक सुधार भएपछि दरबाङदेखि काठमाडौं र काठमाडौंदेखि दरबाङ रात्रिबस सञ्चालन गर्न थालिएको बताए। म्याग्दी नदीमा निर्माणाधीन चारवटा जलविद्युत् आयोजना, सडक, भवन, खानेपानी, पुल, प्रसारण लाइन, सबस्टेसन आयोजनाका निर्माण सामग्री ढुवानी गर्न पनि सहज भएको छ।
पूर्वाधार विकास कार्यालयमार्फत स्तरोन्नतिको अन्तिम चरणमा रहेको बेनी-दरबाङ सडकको विभिन्न ठाउँमा रहेका पहिरोको दीर्घकालीन रोकथाम नहुँदा बर्खायाममा पश्चिम म्याग्दीको यातायात सेवा प्रभावित हुने गरेको छ। रासस
