काठमाडौं- नेपाल र जर्मनीबीच वित्तीय सहयोग र प्राविधिक सहयोगसम्बन्धी दुई महत्वपूर्ण सम्झौताहरुमा हस्ताक्षर भएको छ। बुधबार सम्पन्न यी सम्झौताले नेपालको ऊर्जा, स्वास्थ्य, कृषि, शासन तथा समावेशी विकासका प्राथमिकतालाई सहायता गर्ने लक्ष्य लिएको छ।

नेपालको तर्फबाट अर्थ मन्त्रालयका सहसचिव धनीराम शर्मा र जर्मनको तर्फबाट काठमाडौंस्थित नेपालका लागि संघीय गणतन्त्र जर्मनीका राजदूत उडो भोल्जले हस्ताक्षर गरे।

वित्तीय सहयोग सम्झौताअन्तर्गत जर्मन सरकारले 'पावर डिस्ट्रीब्युसन स्ट्रेन्थेनिङ कार्यक्रम' मा सहयोगस्वरूप २० मिलियन युरोसम्मको प्रतिबद्धता जनाएको छ। यस परियोजना नेपालको विद्युतीय वितरण प्रणालीको स्तरोन्नति र सुदृढीकरणमा केन्द्रित हुनेछ, जसले देशभरि भरपर्दो र प्रभावकारी विद्युत सेवा सुनिश्चित गर्नेछ।

यो परियोजना नेपाल विद्युत प्राधिकरणमार्फत कार्यान्वयन गरिनेछ र त्यसका लागि प्राधिकरण र जर्मन विकास बैंक केएफडब्लूबीच कार्यान्वयन सम्झौता पनि हुनेछ। यो सम्झौताको कार्यान्वयन पाँच वर्षभित्र अर्थात् ५ सेप्टेम्बर २०२९ सम्ममा सम्पन्न हुनुपर्ने उल्लेख गरिएको छ।

प्राविधिक सहयोग सम्झौता सन् १९७४ मा हस्ताक्षर गरिएको दीर्घकालीन ढाँचागत सम्झौता र सन् २००९ मा संशोधित सम्झौतामा आधारित रहेको छ। यसअन्तर्गत २१ मिलियन युरोसम्मको अनुमानित प्रतिबद्धतासहित जर्मनीले स्वास्थ्य र कृषि क्षेत्रमा सहयोग पुर्‍याउने छ।

राष्ट्रिय लैंगिक समानता तथा सामाजिक समावेशी रणनीतिका लागि निरन्तर समर्थन प्रदान गर्दै स्वास्थ्य प्रणालीमा गुणस्तरीय पूर्वाधारलाई थप स्तरीय बनाउन, 
कृषि तथा निजी क्षेत्र विकासमा समावेशी र जलवायु-प्रतिकारशील आर्थिक विकासलाई प्रवर्द्धन गर्ने जीआरएपीई कार्यक्रम र शासन क्षेत्रअन्तर्गत राजस्व क्षेत्र सुधारमा आधारित परियोजना अघि बढाइनेछ जसले दिगो विकासमा योगदान पुर्‍याउने विश्वास लिइएको छ।

यस्तै, 'अध्ययन तथा विज्ञ कोष' मार्फत सल्लाहकार तथा प्राविधिक सहायता प्रदान गर्ने जनाइएको छ। यस प्राविधिक सहायता सम्झौताको कार्यान्वयनसमेत पाँच वर्षभित्र सम्पन्न हुने उल्लेख गरिएको छ।

अर्थ मन्त्रालयका सहसचिव शर्माले जर्मनीको निरन्तर सहयोगप्रति आभार व्यक्त गर्दै यी सम्झौताहरूले नेपाल-जर्मनी सम्बन्धको प्रगाढता र स्थायित्वलाई प्रतिबिम्बित गर्ने र समावेशी तथा दिगो विकासप्रतिको साझा प्रतिबद्धता दर्शाउने बताए। उनले जर्मन सरकार तथा जर्मन जनतालाई नेपालको सामाजिक तथा आर्थिक विकासमा पुर्‍याएको दीर्घकालीन सहकार्य र महत्वपूर्ण योगदानप्रति हार्दिक धन्यवाद व्यक्त गरे।

यस्तै, कार्यक्रममा जर्मन संघीय गणतन्त्रका राजदूतले यो नयाँ प्रतिबद्धताले ऊर्जा, दिगो आर्थिक विकास र स्वास्थ्य क्षेत्रमा नेपाल र नेपाली जनतासँगको सहकार्यलाई अझ प्रगाढ बनाएको धारणा राखे।