सिरहा- गत दुई दिनको अविरल वर्षाका कारण सिरहा र सप्तरीको सिमाना भएर बग्ने बलान नदीमा आएको बाढीले तटबन्ध जीर्ण बनाएको छ।

केही वर्षयता बाढी र कटानको समस्या तीव्र बन्दै गएपछि गाउँको सुरक्षाका लागि करोडौँ खर्चेर निर्माण गरिएको तटबन्ध फेरि भत्किन थालेपछि स्थानीय बासिन्दा पुनः चिन्तित बनेका छन्।

लहान नगरपालिका-२३ तिलबोनामा नदी कटान रोक्न दुई वर्षअघि नगरपालिकाले ५० लाख, मधेस प्रदेश सरकारले ९५ लाख रूपैयाँ र गत वर्षमात्रै संघीय सरकारको खाडो नदी व्यवस्थापन आयोजना कार्यालय राजविराजले एक करोड रूपैयाँ लगानीमा तटबन्ध निर्माण गरेका थिए।

तर हालको बाढीले ती तटबन्धहरूलाई कमजोर बनाएको छ। स्थानीयका अनुसार प्रदेश सरकारको बजेटबाट बनेको तटबन्ध आधा भाग बगिसकेको छ भने संघीय बजेटबाट बनेको तटबन्धमा चिरा परेका छन् र केही भाग भत्किन थालेका छन्।

आज लहान नगप्रमुख महेशप्रसाद चौधरीले स्थलगत निरीक्षण गरी सम्बन्धित निकाय र निर्माण कम्पनीसँग तत्काल मर्मत कार्य गर्न समन्वय गर्ने बताए। उनका अनुसार तत्काल जेसीभी पठाएर तटबन्ध वरिपरि माटो मिलाउने काम सुरु गरिनेछ। 

नगरप्रमुख चौधरीले भने, 'स्थानीयको सुरक्षाका लागि हामी गम्भीर छौँ। म आफै स्थलगत निरीक्षणमा गएँ र सम्बन्धित ठेकेदार तथा निकायलाई तत्काल मर्मत र पुनर्निर्माण कार्य अगाडि बढाउन निर्देशन दिनेछु। नगरपालिकाले पनि सक्दो सहयोग गर्नेछ।'

दशकौँपछि बनेको स्थायी तटबन्ध बाढीले जीर्ण बनाइदिएपछि स्थानीय बासिन्दा चिन्तित बनेका छन्। स्थानीय गंगाप्रसाद यादव भन्छन्, 'यस गाउँको ५५ बिघा जमिनको लालपुर्जा घरमा छ तर जमिन खोलामा बगिसक्यो। यो तटबन्धले हाम्रो जमीन बचाउने आशा थियो, तर फेरि भत्किएपछि अब के होला भन्ने डर छ।'

उहाँका अनुसार पछिल्ला दुई दशकमा लहान नगरपालिका-२३, सखुवा नन्कारकटी गाउँपालिका-४ र ५ तथा भगवानपुर गाउँपालिका-१ र २ मा कटानले झन्डै एक हजार बिघा उर्वर जमिन बगाएको छ। यसले किसानलाई आर्थिकरूपमा ठूलो मारमा पारेको छ।

कोही सुकुम्वासी बनेका छन् भने कोही सामान्य श्रमिक जीवनयापन गर्न बाध्य छन्। तटबन्ध जीर्ण बनेसँगै सामान्य बाढीले नदी कटान गर्ने जोखिम बढेर गएको छ। स्थानीयवासीले तटबन्धलाई दीर्घकालीन समाधान हुनुपर्नेमा जोड दिएका छन्। रासस