काठमाडौं- चालु आर्थिक वर्ष २०८१/०८२ को पहिलो महिना साउनमा नै वैदेशिक रोजगारीका लागि जाने कामदारको संख्या बढेको छ।

वैदेशिक रोजगार विभागका अनुसार चालु आवको साउनमा नेपालबाट वैदेशिक रोजगारीका लागि विदेशिने कामदारको संख्या ५९ हजार ५ सय ७५ जना रहेको छ। यो गत आव २०८०/०८१ को साउन महिनाको तुलनामा बढी हो। 

गत आवको साउनमा रोजगारीका लागि विदेश जाने कामदारको संख्या ५५ हजार ५ सय ७५ थियो। गत आवको साउन महिनाको तुलनामा चालु आवको साउनमा रोजगारीका लागि विदेश जानेको संख्या ५ हजारले बढी हो।

चालु आवको साउनमा नयाँ कामका लागि म्यानपावरमार्फत विदेश जाने कामदारको संख्या २५ हजार ५ सय ७ रहेको छ। गत आवको साउनमा म्यानपावरमार्फत विदेश जाने कामदारको संख्या २९ हजार २ सय २४ जना रहेको थियो।

तर साउनमा मलेसियाको रोजगारी भने ठप्प देखिएको छ। चालु आवको पहिलो महिनामा नेपालबाट मलेस‍िया रोजगारीका लागि जाने कामदारको संख्या १ सय ३४ मात्रै रहेको छ। त्यसमा पनि म्यानपारमार्फत नयाँ कामका लागि जाने कामदारको संख्या पाँचजना मात्रै छ। मलेसियाले कामदार लैजाने गरी मे ३१ देखि कुनै पनि अनुमति दिएको छैन।