सुर्खेत- संघीय सरकारबाट कर्णालीका स्थानीय तहले झन्डै २७ अर्ब बजेट पाएका छन्।

आगामी आर्थिक वर्ष २०८०/८१ का लागि संघीय सरकारले प्रस्तुत गरेको बजेटमा कर्णालीका ७९ वटा स्थानीय तहलाई कुल २६ अर्ब ९७ करोड ९३ लाख बजेट विनियोजन गरिएको छ।

जिल्लागत रुपमा हेर्दा सुर्खेतका स्थानीय तहले सबैभन्दा बढी बजेट पाएका छन्। सुर्खेतका ९ स्थानीय तहका लागि चार अर्ब ८८ करोड ३२ लाख रूपैयाँ बजेट विनियोजन गरिएको छ। मुगुका कुल चार स्थानीय तहलाई एक अर्ब ३९ करोड ६६ लाख रूपैयाँ बजेट छुट्याइएको छ।

संघीय सरकारबाट दैलेखका ११ स्थानीय तहलाई तीन अर्ब ७१ करोड ४८ लाख, जाजरकोटका सात स्थानीय तहलाई दुई अर्ब ६५ करोड ६५ लाख, कालिकोटका नौ स्थानीय तहलाई दुई अर्ब ७५ करोड १३ लाख र हुम्लाका सात स्थानीय तहलाई एक अर्ब ७१ करोड रूपैयाँ बजेट विनियोजन गरिएको छ।

साथै जुम्लाका आठ स्थानीय तहलाई दुई अर्ब ३७ करोड २२ लाख, डोल्पाका आठ स्थानीय तहलाई एक अर्ब ८४ करोड ७१ लाख, सल्यानका १० स्थानीय तहलाई तीन अर्ब ४१ करोड ९३ लाख र रुकुमपश्चिमका छ स्थानीय तहलाई दुई अर्ब २२ करोड ६३ लाख रूपैयाँ बजेट विनियोजन गरिएको छ।

संघीय सरकारले समानीकरण अनुदान, सर्शत अनुदान, विशेष अनुदान र समपुरक अनुदान शीर्षकमा बजेट दिएको हो। रासस