काठमाडौं- कीर्तिमानी आरोही कामिरिता शेर्पा २८औँ पटक सगरमाथाको चुचुरोमा पुगेका छन्।

सोलुखुम्बुको थामे गाउँका कामीरिताले आज बिहान ९:२३ मा २८औँ पटक सगरमाथाको सफल आरोहण गरेको सेभेन समिट ट्रेक्स एभरेष्ट एक्सपिडिसनले जनाएको छ। 

सबैभन्दा धेरै सगरमाथा आरोहण गर्ने कीर्तिमान कामिरिताकै नाममा छ। यसअघि २७औँ पटक हुँदा पनि उनी नै सर्वाधिक थिए। तर सोमबार पासाङ दावा शेर्पाले २७औँ पटक आरोहण गरेर उनीसँग कीर्तिमानी बराबर गरेका थिए।

आज पुन: उनले २८औँ पटक आरोहण गरेर अग्रस्थानमा आफ्नो नाम कायम राखेका छन्। यो सिजनको उनको दोस्रो सगरमाथा आरोहण हो। उनले सन् १९९४ मा पहिलोपटक सगरमाथाको चुचुरोमा पाइला राखेका थिए।

उनले कामीरिता सन् २००९, २०१०, २०१३ र २०१९ मा एकै याममा दुईपटक सगरमाथा आरोहण गरेका थिए।