चामल निर्यातमा भारतले लगायो २० प्रतिशत कर

बिजनेस न्युज

शुक्रबार, भदौ २४ २०७९

चामल निर्यातमा भारतले लगायो २० प्रतिशत कर

संसारभर खाद्यान्न आपूर्तिमा समस्या आएको र भारतमा धानको खेती घटेका कारणले भारतले निर्यातमा कडाइ गर्न खोजेको हो। यो वर्ष भारतमा ५.६२ प्रतिशत धान रोपाइ घटेको छ।

काठमाडौं- भारत सरकारले चामल निर्यातमा कडाइ गरेको छ। आन्तरिक आपूर्तिलाई बलियो बनाउनका लागि भन्दै भारतले चामल निर्यातमा २० प्रतिशत कर लगाउने निर्णय गरेको छ। भारतीय सञ्चार माध्यमहरूमा प्रकाशित समाचारअनुसार बासमती बाहेकको चामल निर्यातमा २० प्रतिशत निर्यात महसुल लगाउने भारतको राजस्व विभागले सूचना जारी गरेको छ।

यो बढेको कर आजदेखि नै लागू हुने छ। संसारभर खाद्यान्न आपूर्तिमा समस्या आएको र भारतमा धानको खेती घटेका कारणले भारतले निर्यातमा कडाइ गर्न खोजेको हो। यो वर्ष भारतमा ५.६२ प्रतिशत धान रोपाइँ घटेको छ।

भारत संसारकै दोस्रो धान उत्पादक देश हो। धान/चामलको विश्वव्यापी चामलमा भारतले ४० प्रतिशत हिस्सा ओगट्दै आएको छ। वर्ष सन् २०२१/२२ मा मात्र भारतले कूल २ करोड १२ लाख टन चामल निर्यात गरेको थियो। बासमती बाहेककै चामल मात्र भारतले ६.११ अर्ब डलरको निर्यात गरेको थियो।