काठमाडौं- गोल्याण ग्रुपको उपाध्यक्षसमेत रहेका बासुदेव गोल्याण रोटरी इन्टरनेसनलको जोन ५ र ६ का लागि रोटरी इन्टरनेसनल निर्देशक बनेका छन्। सन् २०२७-२०२९ कार्यकालका लागि निर्वाचित भएका उनी उक्त पदमा पुग्ने पहिलो नेपाली हुन्।

रोटरी इन्टरनेसनलको गत फेब्रुअरी १० मा सम्पन्न निर्वाचनमा गोल्याण अन्तर्राष्ट्रिय निर्देशक निर्वाचित भएका हुन्। उनले कूल १ हजार ७५५ मतमध्ये ९८१ मत प्राप्त गरेका थिए। रोटरी इन्टरनेसनल जोन ६ अन्तर्गत १० वटा डिस्ट्रिक्सहरू छन्, जसमध्ये ९ वटा भारतमा छन्। रोटरी इन्टरनेसनल निर्देशकको प्रतिस्पर्धामा भारतबाट तीनजना उम्मेदवार भए पनि गोल्याणले विजय हासिल गरेका हुन्।

रोटरी इन्टरनेसनल निर्देशक निर्वाचित भएको अवसरमा शनिबार रोटरी नेपालसँगको सहकार्यमा गोल्याण ग्रुपले उनको सम्मान कार्यक्रम आयोजना गरेको छ। कार्यक्रममा रोटरी इन्टरनेसनल डिस्ट्रिक्ट ३२९२ का डिस्ट्रिक्ट गभर्नर विनोद कोइरालाले गोल्याणलाई सम्मान गरेका थिए। कार्यक्रममा रोटरी इन्टरनेसनलका अध्यक्ष ओलायिन्का हाकीम बाबालोलाले भिडियो कलमार्फत गोल्याणलाई बधाई र शुभकामना दिएका थिए।

कार्यक्रममा गोल्याण ग्रुपका संस्थापक अध्यक्ष तथा प्रमुख संरक्षक पवन गोल्याण, ग्रुपका अध्यक्ष एवं प्रवन्ध निर्देशक अक्षय गोल्याण, पूर्वरोटरी इन्टरनेसनल अध्यक्ष (२०११-२०१२) कल्याण बनर्जी, पूर्वरोटरी इन्टरनेसनल निर्देशक एवं रोटरी फाउन्डेसनका ट्रस्टी (२०२६-३०) एएस वेन्काटेस, पूर्वरोटरी इन्टरनेसनल निर्देशक (२०२३-२०२५) अनिरुद्ध राय चौधरी, पूर्वरोटरी इन्टरनेसनल निर्देशक एवं रोटरी फाउन्डेसनका ट्रस्टी (२००९-२०१३) अशोक महाजन, पूर्वरोटरी इन्टरनेसनल निर्देशक एवं रोटरी फाउन्डेसन इन्डियाका अध्यक्ष डा. महेश कोटबागी, पूर्वरोटरी इन्टरनेसनल निर्देशक (२०१९-२०२१) कमल संघवी, पूर्वरोटरी इन्टरनेसनल निर्देशक एवं काउन्सिल अन लेजिस्लेसनका अध्यक्ष (२०२८) टीएन सुब्रमणियन, एसिस्टेन्ट रोटरी रिजनल फाउन्डेसन कोअर्डिनेटर मिथिलेश कुमार झा लगायतको उपस्थिति थियो।

सो अवसरमा नेपाल र भारतका करिब २ सय पूर्वडिस्ट्रिक्ट गभरनर्सका साथै अन्य उद्योगी-व्यवसायी र रोटरियन सहभागी थिए। उनीहरू सबैले इन्टरनेसनल निर्देशक गोल्याणलाई सम्मानसहित बधाई दिँदै कार्यकाल सफलताको शुभकामना दिएका थिए।

सम्मान ग्रहण गर्दै रोटरी इन्टरनेसनल निर्देशक गोल्याणले अझ धेरै जिम्मेवारी र इमान्दारीका साथ सेवा गर्ने प्रतिबद्धता व्यक्त गरे। ‘आज संसारलाई पहिलेभन्दा बढी रोटरीको आवश्यकता छ, हामी केवल रोटरीका सदस्यमात्र होइन आशाका दूत बन्नेछौँ,’ उनले भने, ‘यसको लागि म रोटरीको मूल्यमान्यतालाई आत्मसात गर्दै हाम्रो प्रभावलाई विस्तार गर्न र अझ बढी मानवताको सेवामा लाग्ने प्रतिबद्धता व्यक्त गर्दछु।’

उनले आफ्नो कार्यकालमा सदस्यता विकास र रोटरी फाउन्डेसनमा योगदान तथा सहभागिता वृद्धि गर्न ध्यान दिने जानकारी गराए। ‘तपाइँ पहुँच नभएकासम्म पुग्नुहोस्, सेवा नपाएकाहरूको सेवा गर्नुहोस् अनि प्रेरणाको स्रोत बन्नुहोस्,’ रोटरियनलाई उनले भने।