.jpg)
.gif)
.gif)
संखुवासभा- संखुवासभामा निर्माणधीन ९ सय मेगावाट क्षमताको अरुण तेस्रो जलविद्युत आयोजनाको विद्युतगृहका मजदुरले तलब नपाएपछि काम ठप्प पारेका छन्। ६ महिनादेखि तलबभत्ता नपाएपछि १ हजार ५ सय जना कामदारले काम ठप्प परेका हुन्।
.gif)
आयोजनाको विद्युतगृह चिचिला गाउँपालिका-२ पुखुवामा कार्यरत मजदुर तथा पेटी ठेकेदारले आज बिहानैदेखि काम ठप्प पारेर आन्दोलन सुरु गरेका हुन्।
.gif)
.gif)
आन्दोलनका कारण आयोजनाको काम पूर्ण रूपमा प्रभावित भएको छ। यसको निर्माणको जिम्मा भारतीय कम्पनी पटेल इन्जिनियरिङले गरिरहेको छ। ६ महिनादेखि तलब नपाएको भन्दै आजदेखि काम ठप्प पारिएको मजदुरहरू बताउँछन्।
निर्माण कम्पनीले समयमा तलब भुक्तानीका लागि चासो नदेखाएपछि असुन्तष्टि जनाउँदै मजदुर तथा पेटी ठेकेदारले काम रोकेका हुन्।
प्रमुख जिल्ला अधिकारी सिर्जना थपलियाले आयोजनाको विद्युतगृहका मजदुरले समयमा तलब भुक्तानी माग गर्दै आन्दोलन सुरु गरेका जानकारी पाएको बताइन्। यसअघि पनि मजदुरले समयमा तलब भुक्तानीका लागि जिल्ला प्रशासन कार्यालयमा निवेदन दिएपछि सम्बन्धित कम्पनीलाई जानकारी गराएको उनले जानकारी दिइन्।
९ सय मेगावाटको उक्त आयोजना भारतीय सतलज कम्पनीले निर्माण गरिरहेको छ। आयोजनाको ड्याम फ्याक्सिदा र विद्युतगृह पुखुवा क्षेत्रमा कार्यरत ३ हजारभन्दा बढी भारतीय र नेपाली कामदारले काम गरिरहेका छन्। पाँच वर्षमा निर्माण सम्पन्न गर्ने लक्ष्य राखिएको उक्त आयोजनाको लागत १ खर्ब २० अर्ब रुपैयाँ अनुमान गरिएको छ।
प्रभावित परिवारलाई आयोजनाले ३० युनिटका दरले निःशुल्क विद्युत् उपलब्ध गराउने सम्झौता भएको छ। उक्त आयोजनाबाट नेपालले २५ वर्षमा ३४० अर्ब रोयल्टी, निःशुल्क बिजुली, आयकर, भ्याट र भन्सार शुल्कमा छुट प्राप्त गर्ने विकास सम्झौतासम्बन्धी पत्रमा उल्लेख रहेको प्रमुख जिल्ला अधिकारी थपलियाले जानकारी दिइन्। रासस
