काठमाडौ‌ं- प्रतिनिधिसभा सदस्यको निर्वाचन नतिजाले नेपाली राजनीतिमा एउटा नयाँ र शक्तिशाली अध्यायको सुरुवात गरेको छ।प्रत्यक्षतर्फको नतिजाअनुसार ४० वर्ष उमेर समूहका ६१ जना युवाहरूले संसदको यात्रा तय गरेका हुन्।

विशेषगरी दुई तिहाइनजिक पुगेको राष्ट्रिय स्वतन्त्र पार्टी (रास्वपा) बाट ५२ जना युवा सांसद निर्वाचित भएका छन्। जसले दशकौँदेखि राजनीतिमा पकड जमाएका पुराना नेताहरूलाई ठूलो धक्का दिएको छ।

यस पटकको निर्वाचनमा सबैभन्दा चर्चाको केन्द्रमा झापा क्षेत्र नम्बर ५ रह्यो, जहाँ राष्ट्रिय स्वतन्त्र पार्टीका ३६ वर्षीय बालेन्द्र शाहले ६८ हजार ३ सय ४८ मतका साथ ऐतिहासिक जित निकाल्दै नेकपा एमालेका अध्यक्ष केपी शर्मा ओलीलाई पराजित गरे।

त्यसैगरी रास्वपाबाटै चितवन-३ मा ३० वर्षीया सोविता गौतमले ५९ हजार २ सय ७७ मत ल्याएर विजय हासिल गरेकी छिन्। उनले नेकपाकी उम्मेदवार रेनु दाहाललाई ३८ हजार ६ सय ६२ मतान्तरले पछाडि पारिन्।

युवा लहरको अर्को उदाहरण मोरङ क्षेत्र नम्बर ६ मा देखिएको छ जहाँ रास्वपाकी ३१ वर्षीया रुबिना आचार्यले ५५ हजार ५ सय १३ मत ल्याएर कांग्रेसका दिग्गज नेता डा. शेखर कोइरालालाई पराजित गरेकी छिन्।

संसद‌मा सबैभन्दा कम उमेरको पुरुष सांसदका रूपमा २५ वर्षीय प्रशान्त उप्रेती निर्वाचित भएका छन्। रास्वपाका उनले मकवानपुर क्षेत्र नम्बर २ बाट नेकपा एमालेका महेशकुमार बर्तौलालाई दोबर मतले पछाडि पार्दै विजयी भए।

काठमाडौं क्षेत्र नम्बर ५ मा पनि रास्वपाकै २९ वर्षीय सस्मित पोखरेलले ३० हजार ७ सय ३७ मतका साथ कांग्रेसका प्रदीप पौडेललाई पराजित गरे।

रूपन्देही-२ बाट रास्वपाका २८ वर्षीय सुलभ खरेलले भारी मतान्तरसहित जित निकाल्दा एमाले उपाध्यक्ष विष्णु पौडेल १२ हजार मतमा समेटिए।

भक्तपुरमा रास्वपाका ३९ वर्षीय राजिव खत्रीले ४२ हजार ३ सय ३४ मत ल्याएर एमालेका प्रभावशाली नेता महेश बस्नेतलाई पराजित गरेका छन्।

पुरानो दल नेपाली कांग्रेसबाट पनि युवाहरूले संसदमा ठाउँ बनाएका छन्। मुस्ताङबाट ३२ वर्षीय योगेश गौचन थकाली ३ हजार ३ सय ७ मतसहित निर्वाचित भएका छन् भने जाजरकोटबाट खड्कबहादुर बुढाले २० हजार १ सय ४२ मतका साथ शक्तिबहादुर बस्नेतलाई पराजित गरेका छन्। त्यस्तै कांग्रेसबाट पाल्पा-१ मा सन्दीप राना र मधेशका युवा नेता मोहम्मद फिरदोश आलम रौतहटमा विजयी भएका छन्।

नेकपा एमालेबाट ४० वर्ष मुनिका दुई जना संसद छिर्न सफल भएका छन्। जसमा ताप्लेजुङबाट क्षितिज थेबे र इलाम-२ बाट ३६ वर्षीय सुहाङ नेम्बाङ रहेका छन्। 

यसैगरी श्रम संस्कृति पार्टीबाट २९ वर्षका आरेन राई खोटाङबाट विजयी भएका छन्। 

यसैगरी राष्ट्रिय प्रजातन्त्र पार्टीबाट ३४ वर्षका ज्ञानबहादुर शाही जुम्लाबाट विजयी भएका छन्। राप्रपाका एकमात्र विजयी उम्मेदवार शाही यसअघि पनि सांसद थिए।