.jpg)
.gif)
.gif)
चितवन- भरतपुर विमानस्थलबाट काठमाडौं र पोखरा उडान गर्ने जहाजले आगामी साताबाट यहाँ इन्धन भर्न पाउने भएका छन्। नेपाल आयल निगमले यही फागुन ६ गतेबाट यहाँ इन्धन भर्न मिल्ने गरी तयारी अघि बढाएको हो।
.gif)
निगमका प्रवक्ता उपनिर्देशक मनोजकुमार ठाकुरले नागरिक उड्डयन प्राधिकरणसँग सम्झौता गरी काम अघि बढाइएको बताए।
.gif)
.gif)
उनले भने, 'यही फागुन ६ गतेबाट रिफिलिङ गर्ने गरी काम भइरहेको छ। डिपो स्टेशन स्थापनाका लागि दुई थान रिफ्युलर र एक थान मोबाइल डिस्पेन्सरको व्यवस्था गरिएको छ। दिगो रूपमा काम गर्न भने ६ महिनादेखि एक वर्ष लाग्ने छ।'
जमिनमुनि वा माथि ट्यांकी राखेर काम गर्नका लागि समय लाग्ने भए पनि तत्काल इन्धन जहाजमा भर्ने व्यवस्था मिलाउन समय नलाग्ने उनले बताए। निगमले यहाँ ३० किलोलिटर इन्धन भण्डारण र व्यवस्थापनका लागि ४ करोड रुपैयाँदेखि ५ करोड रुपैयाँसम्म खर्च हुने जनाएको छ।
नेपाल नागरिक उड्ययन प्राधिकरणका सूचना अधिकारी ज्ञानेन्द्र भुलले प्राधिकरणसँग जग्गा सम्झौता भएको र बाँकी सबै काम निगमले गर्ने बताए। यस कार्यबाट त्यस क्षेत्रमा उडान भर्ने जहाजलाई लाभ मिल्ने उनको भनाइ छ।
बुद्ध एयरले भरतपुरबाट काठमाडौं र पोखरा गरी दैनिक सात वटा जहाज उडान भर्दै आएको छ। दुईवटा ४७ सिटका र पाँचवटा ७२ सिटका जहाजले यहाँबाट उडान भरिरहेका बुद्ध एयर भरतपुरका स्टेशन म्यानेजर भक्तबहादुर बस्नेतले जानकारी दिए। यहाँ तेल भर्ने व्यवस्था भए काठमाडौंबाट यहाँ आउने जहाजमा थप दुई जना यात्रु ल्याउन सकिने उनले बताए।
बुद्ध एयरको ७२ सिटको जहाजले काठमाडौंबाट आउँदा हाल ७० जना बोक्ने गरेको छ भने गर्मीयाममा ६० जना बोक्नुपर्ने बाध्यता छ। बस्नेतका अनुसार यहाँबाट उड्दा भने हाल ५५ जना र गर्मीयाममा ४० जना बोक्ने गरिएको छ।
यस्तै ४७ सिटको जहाजले हाल काठमाडौंबाट आउँदा ४५ जना र फर्कदाँ ४३ जना लिएर जाने गरेको छ। गर्मीयाममा काठमाडौंबाट आउँदा ३५ जना र यहाँबाट जाँदा ३३ जना हाराहारी यात्रु बोकेर जाने गरेको छ। रासस
