खोटाङ- यहाँको साकेला गाउँपालिका-२ रतन्छास्थित धन्नेश्वरी गुफा जनश्रमदानमार्फत सरसफाइ गरिएको छ। 

गाउँपालिकाको 'श्रम साकेला अभियान' अन्तर्गत वडा कार्यालय रतन्छाको अगुवाइमा गाउँपालिका अध्यक्ष रविप्रकाश राई, उपाध्यक्ष बिर्सिका राईसहितका जनप्रतिनिधि, कर्मचारी तथा स्थानीयको सहभागितामा सरसफाइ गरिएको हो। 

लामो समयदेखि संरक्षण र प्रचारप्रसारको अभावमा ओझेलमा परेको यस गुफाको धार्मिक तथा पर्यटकीय विकासका लागि वर्तमान जनप्रतिनिधि र साकेला गाउँपालिकाले चासो देखाएका छन्। आगामी दिनमा गुफासम्म पुग्ने व्यवस्थित पैदलमार्ग निर्माण, गुफा वरिपरि आकर्षक संरचना निर्माण, गुफाभित्र उज्यालोका लागि बत्ती जडान तथा भित्री भागसम्म पुग्न सिँढी निर्माण गर्ने कार्य अघि बढाइने गाउँपालिकाले जनाएको छ। 

रतन्छाका स्थानीयवासीका अनुसार धन्नेश्वरी गुफाको सुरुङ दायाँ-बायाँ करिब सयौँ मिटरभन्दा बढी फैलिएको अनुमान गरिएको छ। गुफाभित्रका ठूलाठूला नागका आकृति एवं विभिन्न देवी-देवताका आकृतिले आन्तरिक तथा बाह्य पर्यटकलाई आकर्षित गर्ने गरेको छ।

परापूर्वकालमा भगवान शिवजी राक्षसबाट बच्न धन्नेश्वरी गुफामा लुकेर बसेको र पछि त्रिधार्मिकस्थल हलेसी गएर बसोबास गरेको भन्ने किंवदन्ती छ। रामनवमी, बालाचतुर्दशी, तीज तथा एकादशी जस्ता महत्त्वपूर्ण पर्वहरूमा यहाँ मेला लाग्ने गर्दछ। 

गाउँपालिकाका अध्यक्ष राईले धार्मिक तथा पर्यटकीयस्थलहरूको विकासका लागि गाउँपालिका दीर्घकालीन योजनाका साथ लागि परेको जानकारी दिँदै धन्नेश्वरी गुफालाई व्यवस्थित धार्मिक-पर्यटकीय गन्तव्यका रूपमा विकास गरिने प्रतिबद्धता व्यक्त गरे। 

'हामी निर्वाचित भएर आएपछि जनजीविकाको कामसँगै गाउँपालिकाभित्रका सबै धार्मिक तथा पर्यटकीयस्थलहरूको स्तरोन्नति गरिरहेका छौँ। हाम्रो पालिका आफैमा पर्यटकीयस्थल हो,' उनले भने, 'यहाँ रहेका पर्यटकीय गन्तव्यहरूको स्तरोन्नति गर्दै पर्यटन प्रवर्द्धनको काम गरिरहेका छौँ।'

गुफाको सौन्दर्यकरणका लागि चालु आर्थिक वर्षमा कोशी प्रदेश सरकारले १० लाख रुपैयाँ बजेट विनियोजन गरेको गाउँपालिकाले जनाएको छ। रासस