नवलपरासी- लक्ष्यभन्दा ढिला काम सुरु गरिएको नवलपरासी (बर्दघाट सुस्तापूर्व) नवलपुरको नमुना सदरमुकाम निर्माण योजनाले पछिल्लो समय गति लिएको छ। कावासोती नगरपालिका-३ स्थित १८७ विघा क्षेत्रफलमा नमुना सदरमुकाम निर्माण भइरहेको छ। 

२०७६ वैशाखमा सदरमुकाम निर्माण सुरु गरिए पनि ६ वर्षसम्म काम अघि बढ्न सकेको थिएन। गत वर्षदेखि निर्माण सुरु गरिएको जिल्लाकै महत्त्वपूर्ण आयोजनाले पछिल्लो समय गति लिएको हो।   

निर्माणस्थलका रुख हटाउने लगायतका विभिन्न प्राविधिक कारण काम अघि बढ्न नसकेको जनाइएका थियो। हाल कामले गति लिएको सघन सहरी तथा भवन निर्माण आयोजना चितवनका इञ्जिनियर द्रोण कटुवालले बताए। 

नमुना सदरमुकाम निर्माण दुईवटा ठेक्कामार्फत भइरहेको छ। पहिलो चरणको ठेक्काबाट जिल्ला प्रशासन कार्यालय र अन्य दुई कार्यालय रहने गरी एकीकृत भवन निर्माण भइरहेको उनले बताए। चौधरी कन्ट्रक्सनले ३० करोड ६५ लाख ६ हजार ५ सय २७ रुपैयाँको लागतमा काम गरिरहेको छ। २०८३ पुस २१ सम्म निर्माण सम्पन्न गर्ने गरी सम्झौता भएको सो योजनाको पहिलो चरणको भौतिक प्रगति हालसम्म ४० प्रतिशत छ। 

दोस्रो चरणको ठेक्काबाट भ्याटबाहेक ३ अर्ब ६१ करोड रुपैयाँको लागतमा सदरमुकाम निर्माणस्थलमा ११ वटा सरकारी कार्यालय भवन निर्माण भइरहेका छन्। भवनबाहेक सडक, खानेपानी, विद्युतका संरचनासहित केरुंगु खोला तटबन्धसमेत निर्माण भइरहेको आयोजना कार्यालयले जनाएको छ। दोस्रो चरणको ठेक्का २०८२ वैशाख २९ गते सम्झौता भई २०८४ कात्तिक २८ गते सम्पन्न गर्ने गरी काम अघि बढेको इञ्जिनियर कटुवालले जानकारी दिए। 

समानान्तर-बुद्ध हिमाली जेभिले निर्माण गरिरहेको यस ठेक्काको हाल करिब १५ प्रतिशत भौतिक प्रगति पुगेको छ। दुवै चरणको काम निर्धारण गरिएको अवधिमा सम्पन्न गर्ने गरी काम भइरहेको उनको भनाइ छ । नवलपुरको नमुना सदरमुकाम निर्माणस्थलमा संघ र प्रदेश मातहतका सबै कार्यालय निर्माण गरिनेछन्। हाल संघीय कार्यालय निर्माण भइरहेका छन्। प्रदेश मातहतका कार्यालय निर्माण थालिएको छैन।

गण्डकी प्रदेश सरकारबाट चालु आर्थिक वर्षमा केही बजेट विनियोजन गरेको जानकारी प्राप्त भएको र प्रदेश सरकार मातहतका कार्यालय निर्माणका लागि बोलपत्र आह्वान हुन सक्ने आयोजना कार्यालयले जनाएको छ। 

नमुना सदरमुकाम निर्माण गुरुयोजनाअनुसार यहाँ संघ र प्रदेश मातहतका सबै कार्यालय, पार्किङ, बाटिका, फुटबल स्टेडियम, क्रिकेट स्टेडियम, कर्मचारीका लागि आवास गृह, अतिथि गृह, सभा हल, पुस्तकालय, खाजा घरलगायतका संरचना निर्माण हुनेछन्। प्रारम्भिक गुरुयोजनाअनुसार आयोजनाको कुल लागत १६ अर्ब २५ करोड ५३ लाख ९० हजार रुपैयाँ छ। रासस