काठमाडौं- नेपाल-कम्बोडियाबीच व्यापार, लगानी तथा सांस्कृतिक सहकार्यलाई सुदृढ गर्ने उद्देश्यले 'नेपाल-कम्बोडिया बी टू बी व्यापारिक अन्तरक्रिया कार्यक्रम २०२६' आयोजना हुने भएको छ । 

यही पुसको अन्तिम साता कम्बोडियामा आयोजना हुन लागेको कार्यक्रम कम्बोडियाको जुवा सप्लाइज एण्ड मेन्टेनेन्स कम्पनी लिमिटेड (जेएसएम कम्बोडिया) द्वारा आयोजना हुनेछ भने नेपालको सिजन मिडियाले कार्यक्रमको व्यवस्थापन गर्ने बताइएको छ। 

कार्यक्रममा नेपालका तर्फबाट नेपाल उद्योग वाणिज्य महासंघ, नेपाल चेम्बर अफ कमर्सलगायत पर्यटन, उड्डयन, यात्रा-पर्यटन, उत्पादन, संस्कृति, प्रविधि तथा आयात-निर्यात क्षेत्रका व्यावसायिक प्रतिनिधिहरूको सहभागिता रहनेछ। कम्बोडियाका तर्फबाट कम्बोडिया चेम्बर अफ कमर्स, पर्यटन तथा आतिथ्य संघसंस्था, उड्डयन कम्पनी, निजी लगानी समूह, व्यापारिक संस्था तथा सांस्कृतिक-सिर्जनात्मक क्षेत्रका प्रतिनिधि सहभागी हुने कार्यक्रम संयोजक रामप्रसाद पाध्याले जानकारी दिए। 

उनका अनुसार एसियन मुलुकका व्यवसायी, कलाकार, उद्यमी र नवप्रवर्तकहरूलाई नेटवर्किङ र अनुभव आदानप्रदानको प्लेटफर्म पनि प्रदान गर्नेछ। 

यसमार्फत नेपाल र कम्बोडियाबीचको द्विपक्षीय मित्रता, सांस्कृतिक कूटनीति र पर्यटन प्रवर्द्धनलाई थप बल मिल्ने अपेक्षा गरिएको गैरआवासीय नेपाली संघ कम्बोडियाका पूर्वअध्यक्ष एवं व्यवसायी लालसिंह खड्काले बताए। कार्यक्रमअन्तर्गत नेपाल-कम्बोडियाका व्यवसायीहरूबीच लगानी तथा व्यापारिक भेटघाट, क्षेत्रगत छलफल, व्यापारिक नेटवर्किङ तथा नीतिगत संवाद सञ्चालन गरिनेछ। पर्यटन तथा आतिथ्य, उड्डयन, यात्रा सेवा, कृषि, उत्पादन, रियल इस्टेट, सांस्कृतिक तथा सिर्जनात्मक उद्योग र डिजिटल नवप्रवर्तन जस्ता उच्च सम्भावनायुक्त क्षेत्रमा संयुक्त लगानी र सहकार्यका अवसर पहिचान गरिनेछ। 

कार्यक्रमको विशेष आकर्षणका रूपमा दुवै देशबीचको आर्थिक विकास, नवप्रवर्तन र द्विपक्षीय सहकार्यमा योगदान पुर्‍याउने उत्कृष्ट उद्यमी, उद्योगपति तथा संस्थाहरूलाई 'इन्टरनेशनल एक्सिलेन्स अवार्ड'बाट सम्मान गरिनेछ। समारोहमा कम्बोडियालगायत एसियन मुलुकका विभिन्न क्षेत्रमा सफल र सक्रिय उद्योगी, कलाकार, नवप्रवर्तन, पर्यटन, शिक्षा र स्वास्थ्यलगायत विभिन्न क्षेत्रका असाधारण योगदान दिएका व्यक्तित्व र संस्थाहरूलाई अवार्ड प्रदान गरिनेछ।

एसियन मुलुकभरका पेसागत र संस्थागत व्यक्तित्वको योगदानलाई मान्यता दिने र अन्तर्राष्ट्रिय सहयोग तथा सांस्कृतिक आदानप्रदानलाई प्रवर्द्धन गर्न 'इन्टरनेशनल एक्सिलेन्स अवार्ड' प्रदान गर्न लागिएको कार्यक्रम व्यवस्थापक प्रदीपराज वन्तले बताए। अन्तर्राष्ट्रिय व्यापार सम्मेलन २०२६ कार्यक्रम केवल व्यापारिक भेटघाट मात्र नभई दुवै देशबीच दीर्घकालीन साझेदारी, जनस्तरको सम्बन्ध विस्तार र साझा समृद्धिको आधार निर्माण गर्ने महत्त्वपूर्ण मञ्चको रूपमा रहेको र यसले द्विपक्षीय व्यापार प्रवर्द्धन, पर्यटन विकास र लगानी विस्तारमा उल्लेखनीय योगदान पुर्‍याउने विश्वास गरिएको व्यवसायी खड्काले बताए।

यसैबीच कम्बोडियाका चेम्बर अफ कर्मसका डाइरेक्टर जनरल, डेपुटी डाइरेकटर जनरललगायत अन्य पदाधिकारी र नेपाल चेम्बर फ कर्मसका अध्यक्षलगायत अन्य प्रतिनिधि र विभिन्न व्यवसायीहरूसँग भेटघाट भइसकेको छ। कम्बोडिया सरकारका पर्यटन उपमन्त्रीका राज्य सचिव डा. थोक सोखोम, पर्यटन मन्त्रालयका सचिव कुच पन्नहासा र कम्बोडियन ट्रेड प्रमोशन एसोसिएशनका संस्थापक अध्यक्ष जेसी म्याककुलसँग दुई देशबीचको पर्यटन आदानप्रदान प्रवर्द्धन तथा नेपाल र कम्बोडियाका व्यवसायीबीच हुने व्यावसायिक भेटघाट कार्यक्रमलाई कसरी व्यवस्थित र सफलतापूर्वक सम्पन्न गर्ने भन्ने विषयमा विस्तृत छलफल भएको कार्यक्रम संयोजक पाध्याले जानकारी दिए। रासस