काठमाडौं- सुनको मूल्य नेपाली बजारमा हालसम्मकै उच्च बनेको छ। बुधबार सुन तोलामा १ लाख ५ हजार ५ सय रूपैयाँमा कारोबार भइरहेको छ। 

बुधबार कारोबार भइरहेको मूल्य नेपाली बजारमा अहिलेसम्मकै उच्च हो। यसअघि २०७७ साउन २३ गते १ लाख ३ हजार ५ सय रूपैयाँमा सुनको उच्च कारोबार भएको थियो।

आइतबार र सोमबार लगातार बढेको सुनको मूल्य मंगलबार भने स्थिर देखिएको थियो। मंगलबार सुनको मूल्य तोलामा १ लाख ३ हजार रुपैयाँ थियो। सोमबार पनि सुन १ लाख ३ हजार रुपैयाँमै कारोबार भएको थियो। 

रुस-युक्रेन युद्धका कारण सुनको मूल्य बढिरहेको छ। पछिल्लो केही दिनयता लगातार बढेको सुनको मूल्य मंगलबार भने रोकिएको हो। तथापी अन्तर्राष्ट्रिय बजारमा सुनको मूल्य बढ्ने संकेत देखिएकाले नेपाली बजारमा समेत त्यसको प्रभाव पर्ने व्यवसायीहरुले बताएका छन्।

चाँदिको मूल्य पनि बुधबार बढेको छ। मंगलबार १४ सय १० रुपैयाँमा कारोबार भएको चाँदी बुधबार प्रतितोला १४ सय ५० रूपैयाँमा कारोबार भइरहेको नेपाल सुनचाँदी व्यवसायी महासंघले जनाएको छ।