काठमाडौं- भारतको सबैभन्दा ठूलो विमान सेवाप्रदायक इन्डिगोमा गएको एक सातादेखि देखिएको गम्भीर अव्यवस्थाले देशभरको उड्डयन क्षेत्र नै तनावग्रस्त बनेको छ।

नयाँ फ्लाइट ड्युटी टाइम लिमिटेशन नियम लागू भएपछि आवश्यक पाइलट तथा क्रू व्यवस्थापनमा चर्को कमी देखिँदै गएपछि एयरलाइनले सयौँ उडान एकैपटक रद्द गर्नुपरेको हो। यसले दिल्ली, हैदराबाद, अहमदाबाद, कोलकातालगायत प्रमुख विमानस्थलमा यात्रुको भीड, अव्यवस्था र असन्तोषले वातावरण थप जटिल बनाएको भरतीय सञ्चार मन्त्रालयले जनाएकाे छ।

हैदराबाद विमानस्थलमा योजना गरिएको दर्जनौँ उडान उड्नै नसक्दा दिनभर यात्रु अलपत्र परे भने दिल्लीमा पनि ठूलो संख्यामा उडान रद्दको घोषणा भएपछि बिहानदेखि नै काउन्टरदेखि बोर्डिङ गेटसम्म यात्रु व्यवस्थापन चुनौतीपूर्ण बनेको थियो।

अहमदाबाद र कोलकातामा समेत उस्तै दृश्य देखियो, जहाँ पटक-पटक हुने रद्द घोषणा र समयतालिका परिमार्जनले एयरपोर्ट सञ्चालन नै अवरुद्ध हुन पुगेको थियो। विमानस्थलभित्र परिवार, बालबालिका र यात्राका कारण बाध्यतावश यात्रा गर्नुपर्ने मानिसहरू घण्टौँसम्म प्रतीक्षा गर्न बाध्य भए।

संकटले चर्को रूप लिएपछि नागरिक उड्डयन महानिर्देशनालयले इन्डिगोको समग्र सञ्चालन प्रक्रिया, क्रू योजना र नयाँ नियमअनुसारको तयारीबारे तत्काल अध्ययन गर्न चार सदस्यीय समिति गठन गरेको छ।

समितिलाई एयरलाइनमा उत्पन्न अव्यवस्थाको कारण पहिचान गरी सुधारसम्बन्धी सुझावसहित प्रतिवेदन बुझाउन निर्देशन दिइएको छ। यसैबीच नागरिक उड्डयन मन्त्रालयले एयरलाइनलाई सबै रद्द उडानका टिकटको पैसा समयमै फिर्ता गर्न, यात्रुबाट कुनै किसिमको रद्द वा पुनः तालिम शुल्क नलिन र छुट्टिएको सामान यात्रुको घरसम्म पुर्‍याउन कडा निर्देशन दिएको छ।

इन्डिगोले भने सम्भव भएसम्म दैनिक उडान संख्या सामान्य स्तरमा पुर्‍याउने प्रयास भइरहेको जनाएको छ। एयरलाइन्सले यात्रुलाई परेको असुविधाबापत माफी माग्दै समस्या समाधानमा प्राथमिकतापूर्वक काम भइरहेको दाबी गरेको छ। यद्यपि, कतिपय विमानस्थलमा अझै पनि उडान तालिका अस्थिर छ र यात्रुले अनिश्चित प्रतीक्षा भोग्नु परिरहेको छ।

यस घटनाले भारतको उड्डयन नीतिगत तयारी, क्रू व्यवस्थापन तथा नियामक निकायको सतर्कताबारे पनि गम्भीर प्रश्न उठाएको छ। विपक्षी दलहरूले सरकार र नागरिक उड्डयन दुबैलाई पछिल्ला दुई वर्षदेखि पूर्वतयारी नगरेको आरोप लगाउँदै उड्डयन क्षेत्रमा विकसित भएको ‘मोनोपोली मोडल’ का कारण यस्तो संकट आइपरेको टिप्पणी गरेका छन्। इन्डिगोको ठूलो बजार हिस्सेदारीका कारण एउटा एयरलाइन्समा उत्पन्न अव्यवस्थाले देशभरकै आवागमन प्रभावित भएको हो।