बाँके- बाँकेको राप्तीसोनारी गाउँपालिकाले महिलालाई आत्मनिर्भर बनाउन हस्तकला सीप सिकाएको छ। स्थानीय स्रोतसाधनको प्रयोग गरी स्वरोजगार र महिलालाई आत्मनिर्भर बनाउने लक्ष्यका साथ गाउँपालिकाले सीप सिकाएको हो।

प्राकृतिक रेशाजन्य वनस्पति थाकलको पात र मकैको पोस्करबाट हस्तकलाका विभिन्न सामग्री उत्पादनसम्बन्धी एकमहिने तालिम प्रदान गरेको हो। तालिम प्रशिक्षक राप्ती सोनारी-४ बैजापुरकी कल्पना थारुले थाकलको पात र मकैको पोस्करबाट हस्तकलाका विभिन्न सामग्री उत्पादन गरी महिलालाई स्वरोजगार बनाउने उद्देश्ले सीप सिकाइएको जानकारी दिइन्।

गाउँघरमा खेर गएका कच्चापदार्थबाट टोपी र झोला बनाउन सकिने भएपछि राम्रो आम्दानी हुने आशा जागेको स्थानीय उमा थारुको भनाइ छ। उत्पादन गरिएका सामान बिक्री वितरण गर्न सकिए पारिश्रमिक राम्रो पाइने भएपछि आफूले सीप सिकिरहेको उनले बताइन्।

गाउँपालिका अध्यक्ष तप्त पौडेलले हाल ६० महिलाले मकैको पोस्कर, खोस्टा तथा थाकलको पातबाट विभिन्न हस्तकलाका सामग्री बनाउने सीप सिकिरहेको बताए। सीप सिकेपछि महिलाले बनाउने सामग्री ओम राजश्री मल्टिएग्रो प्राली काठमाडौंले बजारीकरण गर्नेगरी सम्झौता भएको छ।

पालिकाका ९ वटै वडामा तयार भएका सामग्री संकलन गरेर बजारीकरणमा गाउँपालिकाले सहयोग गर्ने अध्यक्ष पौडेलले प्रतिबद्धता व्यक्त गरे। गाउँपालिका उपाध्यक्ष मनिषा सिंह थारुले लक्षित वर्गलाई प्राथमिकतामा राखेर सीपमूलक तालिम सञ्चालन गरिएको बताइन्।

‘अन्तर्राष्ट्रिय बजारसम्म निर्यात गर्ने उद्देश्यसहित गाउँपालिकाले मकैको पोस्कर र थाकलबाट बनाइने झोला र टोपी उत्पादनका लागि जनशक्ति उत्पादन गरिरहेको छ’ उनले भनिन्, ‘यसले एकातिर आयआर्जनमा टेवा पुर्याउनेछ भने अर्कोतर्फ हाम्रा उत्पादनहरू विदेश निर्यात हुँदा गाउँपालिकाको पहिचान हुने विश्वास गरेका छौँ।’

तालिममा लक्षित वर्गअन्तर्गत कुमाल, वादी, खुना, मुक्तकमैया, मुक्त कम्लरी, द्वन्द्वपीडित, एकल महिलालगायतलाई प्राथमिकतामा राखेर तालिम दिने काम भइरहेको छ। गाउँपालिकाका ९ वटै वडालाई लक्षित गरेर चार ठाउँमा तालिम भइरहेको छ।

वडा नम्बर १ को कुसुम, वडा नम्बर २, ८ र ९ का लागि वडा नम्बर८ को वडा कार्यालयमा, वडा नम्बर ३, ४ र ५ लाई लक्षित गरेर वडा नम्बर ४ को कार्यालयमा तालिम सञ्चालन भएको छ। त्यस्तै वडा नम्बर ६ र ७ लाई लक्षित गरेर अपांगता पुनस्र्थापना केन्द्र फत्तेपुरमा तालिम सञ्चालन भइरहेको छ। रासस