काठमाडौ‌ं- राष्ट्रिय सुरक्षा परिषद्को बैठकमा हालै विकसित भारत-पाकिस्तानबीच भएको घटनाक्रमबाट नेपालमा पर्नसक्ने विविध सुरक्षा चुनौती तथा असरहरुको सम्बन्धमा समीक्षा गरिएको छ।

राष्ट्रिय सुरक्षा परिषद्को बैठकले उक्त समीक्षा गरेको हो। बैठकमा उक्त घटनाक्रमबाट उत्पन्न हुनसक्ने परिस्थितिको सुक्ष्म विश्लेषण गरी आगामी दिनमा आइपर्ने परिस्थितिको सामना गर्न उपयुक्त रणनीति अपनाउने सम्बन्धमा छलफल भएको छ।

रक्षा मन्त्रालयका सचिव एवं परिषद्का सदस्य-सचिव रामेश्वर दंगालका अनुसार सिंहदरबारस्थित परिषद्को सचिवालयमा प्रधानमन्त्री एवम् परिषद्का अध्यक्ष केपी शर्मा ओलीको अध्यक्षतामा बैठक बसेको थियो।

परिषद्को ३८औँ बैठकमा परिषद्का सदस्य उपप्रधानमन्त्री एवं अर्थमन्त्री, गृहमन्त्री, परराष्ट्रमन्त्री, रक्षामन्त्री, मुख्यसचिव, प्रधान सेनापति र रक्षासचिवको सहभागिता थिया्। रासस