काठमाडौं- नेपाल विद्युत प्राधिकरणका कार्यकारी निर्देशक हितेन्द्रदेव शाक्यले लोडसेडिङको युग अब सकिएको बताएका छन्। शुक्रबार प्राधिकरणको श्वेतपत्र जारी गर्दै कार्यकारी निर्देशक शाक्यले यस्तो बताएका हुन्।

उनले प्रसारण प्रणालीतर्फ आर्थिक वर्ष २०८१/८२ को फागुन मसान्तसम्म ३१ पटक गरी ४ घण्टा २ मिनेट आंशिक प्रणाली ट्रिपिङ भएको बताए।

वितरण प्रणालीमा देशभरि जडित थ्री फेज स्मार्ट मिटरमध्ये करिब ४८ हजार मिटरको २०८१ साउनदेखि चैत्रसम्मको तथ्यांकको आधारमा वार्षिक औसत ८२५ पटक र ३७ मिनेट प्रति अवरोध गरी जम्मा ५०९ घण्टा ग्राहकहरूमा औसत विद्युत अवरुद्ध भएको उनले जानकारी दिए।

यो अवरोध समयलाई कम गरिँदै लैजाने उनले बताए। ठूला परियोजना निर्माण गर्ने, आयात रोक्ने र जलाशययुक्त आयाेजना बनाउनु नै यसको समाधान रहेको उनको भनाइ छ।