काठमाडौं- साझा यातायातले विद्युतीय कार खरिद गरेको छ। यातायातले मंसिर २१ गते विद्युतीय कार खरिद गर्न टेन्डर गरेको थियो। 

उक्त टेन्डरमा विभिन्न कम्पनीले प्रस्ताव गरेकोमा साझाले निसानको विद्युतीय कार बिक्री गर्ने पायोनियर मोटोकर्पको प्रस्ताव स्वीकृत गरेको हो।

साझा यातायातको यही माघ १० गते बसेको सञ्चालक समितिको बैठकले पायोनियर मोटोकर्प थापाथलीको प्रस्ताव स्वीकृत गरेको हो। उक्त प्रस्तावअनुसार पायोनियरले ५५ लाख ४९ हजार रूपैयाँमा निसानको लिफ विद्युतीय कार उपलब्ध गराउने छ।

साझा यातायातले सार्वजनिक खरिद ऐन २०६३ को दफा २७(२)को प्रयोजनका लागि लाभग्राही मध्येबाट उपयुक्त कम्पनी छनोट गरेको हो।

निसानले केही वर्षअघि नै निसानको लिफ विद्युतीय कार नेपाली बजारमा बिक्री गर्दै आएको छ। कम्पनीका अनुसार हाल निसान लिफको सुरवाती बजार मूल्य ६४ लाख ९९ हजार रूपैयाँ रहेको छ।

निसान लिफमा ४० किलोवाट आवरको ब्याट्री प्याक रहेको छ भने एक पटकको फुल चार्जमा ३ सय ११ किलोमिटर रेन्ज दिने दाबी कम्पनीको छ। निसान लिफ फुल चार्ज गर्न ७.५ घण्टा लाग्ने कम्पनीले जनाएको छ।