काठमाडौं- अन्तर्राष्ट्रिय उडानका लागि चारवटा जहाज भएको नेपाल एयरलाइन्सको एउटा जहाज आकस्मिक रुपमा ग्राउन्डेड हुँदा उड्नका लागि तयार भएका पाँच सय यात्रु प्रभावित भएका छन्। 

कतारको दोहा उड्न ठिक्क परेको जहाज आज बिहान १ बजे काठमाडौं विमानस्थलमा प्राविधिक समस्याका कारणले ग्राउन्डेड भएपछि काठमाडौं र कतारमा यात्रु प्रभावित भएका हुन्। 

उडानका लागि तयारीमा रहेको एयरलाइन्सको वाइडबडी जहाजको कम्प्युटिङ सेन्सरमा समस्या देखिएपछि थप मर्मत गर्नुपर्नेभन्दै ग्राउन्डेड गरिएको थियो। जहाजमा समस्या आएपछि काठमाडौंबाट उड्न तयार २७६ जना यात्रुलाई राति नै होटलमा राखिएको थियो। त्यस्तै आज दोहाबाट काठमाडौं आउनका लागि टिकट लिएका २५४ यात्रु प्रभावित भएका छन्। 

चारवटा जहाज भएको नेपाल एयरलाइन्सको एउटा जहाज मर्मतका लागि इजरायल पठाइएको छ। तीनवटामा थप अर्को पनि ग्राउन्डेड भएको यो मर्मतका लागि अझै समय लाग्ने देखिएको छ। 

बाँकी रहेका दुई जहाजबाट सेड्युलमा रहेका अरु उडान रद्ध नगरी कतारको उडान सम्भव देखिएको छैन। तत्काल ५ सयभन्दा बढी यात्रु र आधा दर्जन अरु उडान प्रभावित हुने भएका छन्।