काठमाडौं- २०७८ सालको साउनदेखि कात्तिकसम्म २७ अर्ब रुपैयाँको सुनचाँदी आयात भएको छ। 

भन्सार विभागले सार्वजनिक गरेको अन्तर्राष्ट्रिय व्यापारको तथ्यांकअनुसार यो अवधिमा कूल २७ अर्ब १८ करोड रुपैयाँको सुनचाँदी आयात भएको हो। 

विभागका अनुसार यो अवधिमा १४ अर्ब ९५ करोड ५० लाख रुपैयाँको सुन आयात भएको छ। यो अवधिमा २१ लाख ७७ हजार ५ सय ग्राम सुन आयात भएको हो। 

त्यस्तै यही अवधिमा १२ अर्ब  २२ करोड ८० लाख रुपैयाँको १२ करोड ९४ लाख ग्राम चाँदी आयात भएको छ। 

यो अवधिमा धेरै रुपैयाँको आयात हुने  १० वस्तुको सूचीमा सबैभन्दा माथि डिजेल रहेको छ। ३४ अर्ब ३३ करोड २१ लाख रुपैयाँको डिजेल आयात भएको छ। 

त्यस्तै प्रशोधन नगरिएको भटमासको तेल २७ अर्ब २२ करोड ७१ लाख रुपैयाँ, मोबाइल फोन २० अर्ब ३५ करोडको आयात भएको छ। 

त्यस्तै प्रशोधन नगरिएको पाल्म तेल १८ अर्बको आयात भएको छ भने १७ अर्बको स्टिल आयात भएको छ। खाना पकाउने ग्यास १७ अर्ब रुपैयाँको आयात भएको छ। यही अवधिमा ९ अर्ब रुपैयाँको औषधि तथा मेडिकल उपकरणको आयात भएको छ।