डोटी- डोटीको पूर्वीचौकी गाउँपालिका-२ बगलेक स्वास्थ्यचौकी भवन निर्माणमा संलग्न मजदूरले एक वर्षदेखि काम गरेको ज्याला पाएका छैनन् । भवन निर्माणको ठेक्का पाएको बाराही निर्माण सेवाले मजदूरलाई ज्याला नदिएपछि उनीहरु मारमा परेका हुन्। 

विसं २०७७ मा १ करोड ७० लाख रुपैयाँमा भवन निर्माणको ठेक्का पाएको पिएस पिएस कन्सट्रक्शन प्रालि, सिलगढीले पेटी ठेक्का बाराही निर्माण सेवालाई प्रदान गरेको हो। निर्माण सेवाले भवन निर्माण सम्पन्न गरे पनि मजदूरलाई भने काम गरेवापतको रकम अहिलेसम्म दिएको छैन। भवनको काम सम्पन्न भई कार्यालय सञ्चालनमा आइसक्दा पनि ज्याला नपाएको स्थानीय जगत बिकले बताए। उनले भने, 'भवन हस्तान्तरण भइसकेको छ, मजदूरको ज्याला बाँकी नै छ।'

मजदूरले दैनिक ४ सय रुपैयाँका दरले भवन निर्माणमा काम गरेका थिए। पूर्वीचौकी गाउँपालिका-२ का हीरादेवी ओली मजदूरले निर्माण कम्पनीविरुद्ध आन्दोलनको तयारी गरेको बताउँछिन्।

पिएस कन्सट्रक्शनका प्रोप्राइटर प्रेमशङ्कर भट्टले बाराही निर्माण सेवाले ज्याला दिनुपर्ने बताए। उनले भने, 'सम्पूर्ण खर्च निर्माण सेवाले नै तिर्नुपर्छ।' प्रमुख जिल्ला अधिकारी शङ्करबहादुर विष्टले ज्याला नपाएको कसैले पनि प्रशासनमा उजुरी नदिएको बताए। घर नजिकै रोजगारी पाएपछि खुशी भएका स्थानीयवासी ज्याला नपाएपछि पीडित बनेका छन्। रासस