काठमाडौं- नेकपा एमालेको पार्टी सदस्यता सङ्ख्या ७ लाख ८९ हजार ६ सय २० जना पुगेको छ। जसमार्फत महाधिवेशनका लागि प्रति सदस्य कम्तिमा एक सय रुपैयाँ उठाउँदा एमालेले अधिवेशनका लागि ७ करोड ८९ लाख ६२ हजार रुपैयाँ जम्मा गर्ने भएको छ।  

दशौँ राष्ट्रिय महाधिवेशन लक्षित गरी वितरण गरिएको पार्टी सदस्यता ७ लाख ८९ हजार ६ सय २० जना पुगेको एमाले कार्यालय सचिव शेरबहादुर तामाङले जानकारी दिए। जसमा ५ लाख ९९ हजार ६ सय २४ जना पुरुष र १ लाख ८८ हजार ९ सय ९६ जना महिला रहेका छन्।

बुधबार ललितपुरस्थित तुलसीलाल स्मृति प्रतिष्ठान भवनमा बसेको नेकपा एमाले १० औं राष्ट्रिय महाधिवेशन मूल व्यवस्थापन कमिटीको बैठकले पार्टीको महाधिवेशनका लागि सबै सदस्यहरूलाई कम्तिमा एक सय रुपैयाँ पार्टीको खातामा जम्मा गरिदिन अपिल गरेको थियो। सदस्यहरूले एक सय रुपैयाँभन्दा बढी खातामा जम्मा गरिदिने हुँदा उठ्ने रकम अझ बढ्ने देखिन्छ। 

एमालेको नवौँ महाधिवेशनमा ५ लाख ९१ हजार सङ्गठित सदस्य रहेका थिए। पार्टीको दशौँ महाधिवेशनमा आइपुग्दा एमालेले १ लाख ९८ हजार सङ्गठित सदस्य थप गरेको छ।

एमालेको दशौँ महाधिवेशन यही मङ्सिर १० देखि १२ गते चितवनमा हुँदैछ। महाधिवेशनमा २०७७ चैतमसान्तसम्म सदस्यता लिएका व्यक्तिले मात्र महाधिवेशनमा प्रतिनिधि चयन हुन पाउनेछन्। एमाले महाधिवेशनका लागि कात्तिक २७ गते शनिबार देशभर एकैसाथ प्रतिनिधि छनोट गर्दैछ। महाधिवेशनमा १ हजार ९ सय ९९ जना प्रतिनिधि सहभागी हुनेछन्।