काठमाडौं- सार्वजनिक खरिद अनुगमन कार्यालयले २३ निर्माण कम्पनी तथा आपूर्तिकर्तालाई कालोसूचीमा किन नराख्ने भनेर स्पष्टीकरण सोधेको छ।

कार्यालयले विभिन्न निकायबाट समयमा काम नगर्ने निर्माण कम्पनी तथा आपूर्तिकर्तालाई कालोसूचीमा राख्न सिफारिस गरेको हो। 

समयका काम नगर्ने निर्माण कम्पनी र आपूर्तिकर्तालाई कालोसूचीमा राख्न ठेक्का लगाउने निकायले सिफारिस गर्ने पर्छ। सोही सिफारिसका आधारमा कार्यालयले अन्तिम मौका स्वरुप स्पष्टीकरण सोधेर चित्तबुझ्दो जवाफ नआएपछि कालोसूचीमा राख्ने गरेको छ। 

सार्वजनिक खरिद अनुगमन कार्यालयले २३ निर्माण कम्पनी तथा आपूर्तिकर्तालाई ३० दिन भित्र स्पष्टीकरण पेश गर्न भनेको थियो। उक्त समयमा ती कम्पनीहरुले लिखित स्पष्टीकरण पेश नगरेकाले आइतबार पुनः ७ दिने अर्को सूचना जारी गरेको हो। 

७ दिनभित्र सूचनाअनुसार लिखित स्पष्टीकरण पेश नगरे कार्यालयले सार्वजनिक खरिद नियमावली २०६४ को नियम १४१ को उपनियम ४क अनुसार कारबाही हुने जनाएको छ।