काठमाडौं- नेपाल आयल निगमका पूर्वकार्यकारी निर्देशक गोपाल खड्कालाई गैरकानूनी सम्पत्ति आर्जन मुद्दामा दोषि ठहर गर्दै विशेष अदालतले एक वर्ष तीन महिना कैद र १८ करोड ३९ लाख २ सय ६८ रूपैयाँ जरिवाना हुने सजाय तोकेको छ। 

विशेषका अध्यक्ष श्रीकान्त पौडेल तथा सदस्यद्वय शालिग्राम कोइराला र खुसीप्रसाद थारुको इजलासले उनको घरजग्गादेखि बैंक मौज्दातसम्म जफत हुने फैसला गरेको छ। अख्तियारले २०७५ पुस २३ मा खड्काविरुद्ध मुद्दा चलाएको थियो। 

गोपालसँगै उनकी श्रीमती शर्मिला खड्कालाई समेत प्रतिवादी बनाइएकोमा शर्मिलाका नाममा रहेको कित्ता नं १५२२ र १४२३ मा रहेको घरसमेत जफत हुने भएको छ। यस मुद्दाका अन्य प्रतिवादीहरुलाई जफत प्रयोजनका लागि प्रतिवादी बनाइएकोमा उनीहरुको नाममा रहेको सम्पत्ति पनि जफत हुने फैसला भएको छ।

यसै मुद्दाकी अर्की प्रतिवादी अमिता लामा सोदेम्बाको नाममा रहेको कित्ता नम्बर ११९ को घरजग्गासहितका सम्पत्ति पनि जफत हुने भएको छ। अख्तियारले सिजी डेभलपर्स प्रालिलाई पनि प्रतिवादी कायम गरेकोमा उक्त कम्पनीको सम्पत्ति पनि जफत हुने फैसला भएको छ।