काठमाडौं- आगामी तीन दिन देशका अधिकांश प्रमुख तथा मझौला नदीहरुमा बहाब सामान्य बढ्ने तर सतर्कता तहभन्दा तलै रहने बाढी पूर्वानुमान महाशाखाले जनाएको छ।

नदी तटीय क्षेत्रहरूमा सामान्य सतर्कता अपनाउन पनि महाशाखाले अनुरोध गरेको छ।

महाशाखाका अनुसार बिहीबार बैतडी, डडेल्धुरा, डोटी, लमजुङ, पाल्पा, नवलपरासी पश्चिम, दोलखा, सिन्धुपाल्चोक, सोलुखुम्बु, ओखलढुंगा, पाँचथर र आसपास भई बग्ने केही स-साना नदीहरुमा बहाव बढ्न सक्ने छ।

शुक्रबार गण्डकी प्रदेशको पहाडी भू-भाग तथा लुम्बिनी प्रदेश भई बहने केही स-साना नदीहरुमा बहाव बढ्न सक्ने अनुमान छ। यस्तै गण्डकी प्रदेशको बागलुङ, पर्वत, स्याङ्जा, कास्की, लमजुङ र तनहुँ जिल्लाका केही स-साना नदीहरुमा आकस्मिक बहावको जोखिम रहने महाशाखाले जनाएको छ। साथै कर्णाली र सुदूरपश्चिम प्रदेशको पहाडी भू-भाग भई बहने केही नदीहरुमा पनि भोलि बहाव बढ्न सक्ने पूर्वानुमान छ। 

शनिबार गण्डकी र लुम्बिनी प्रदेशको पहाडी भू-भागका नदीहरुमा बहाव बढ्न सक्ने महाशाखाको अनुमान छ। 

आगामी तीन दिन कमला, कन्काई, कोशी, नारायणी, बागमती पूर्वी राप्ती कर्णाली पश्चिम सेती महाकाली बबई र यसका सहायक नदीहरुमा जलसतह सतर्कता तहभन्दा तलै रहे पनि बढ्दो हुने रहेकाले नदी तटीय क्षेत्रमा सतर्कता अपनाउन महाशाखाले अनुरोध गरेको छ।