काठमाडौं- इन्जिनियरहरूले ‘राष्ट्र निर्माणमा समर्पित’ भन्ने नारासहित बस्नयोग्य काठमाडौं निर्माण अभियान चलाउने भएका छन्। डेमोक्रेटिक इन्जिनियर्स एलाइन्सले आइतबार विज्ञहरूसँग छलफल गरेर अभियान सुरु गरेको हो।

काठमाडौं उपत्यकामा बढ्दो जनसंख्या तथा अनियन्त्रित विकास निर्माण कार्यबाट बसोबास गर्ने सबै उपत्यकावासीलाई प्रभाव परिरहेको विषयमा ध्यान दिएर अभियान सुरु गरेको एलाइन्सका अध्यक्ष ई. ध्रुप थापाले बताए। ‘दिगो र बस्नलायक सहरको रुपमा विकसित गर्नु आजको चुनौती रहेको छ,’ अध्यक्ष थापाले भने। 

राष्ट्रको विकासमा क्षमता प्रदान र सहयोग गर्ने सबै सरोकारवालाबीच समन्वयात्मक सहकार्य गरी अघि बढ्न अभियान सुरु गरेको अध्यक्ष थापाले बताए। ‘विभिन्न विधामा अनुभव हासिल गर्नका लागि बरिष्ठ इन्जिनियर तथा मूल पुस्ताको ज्ञानलाई समेत समायोजन गर्दै जाने उद्देश्यले अभियान सुरु गरेको हो,’ थापाले भने। 

काठमाडौं उपत्यकालाई बस्नलायक सहर बनाउनका लागि पहिलो चरणको छलफल गरेको हो। कार्यक्रममा एसियाली विकास बैंकका पूर्वउपाध्यक्ष डा. विन्दुनाथ लोहनी प्रमुख वक्ताको रुपमा सहभागी भएका थिए। कार्यक्रममा आधा दर्जन विज्ञहरुले काठमाडौं उपत्यकाको विकासका सम्बन्धमा आफ्नो धारण राखेका थिए।