काठमाडौं- नेपाल राष्ट्र बैंकको बबरमहलस्थित टक्सार विभागबाट तिहारमा ३ हजार १ सय वटा सुनका सिक्का बिक्री भएको छ। 

तिहारमा सिक्का बिक्रीका लागि विभागले आह्वान गरेपछि गएको सोमबार र मंगलबार सुन र चाँदीको असर्फी किन्नेहरुको घुँइचो लागेको थियो। सुनका सिक्का (असर्फी) किन्न विभागले हरेक दिन कोटा निर्धारण गरेका कारण कतिपय खाली हात नै समेत फर्कनुपर्‍यो। 

टक्सार विभागले गणेश र लक्ष्मीको फोटो अंकित असर्फी तयार गरेर बेचेको थियो। पाँच ग्राम असर्फीको मूल्य ४० हजार ४३८ रुपैयाँ र २ दशमलव ५ ग्राम असर्फीको विक्री मूल्य २० हजार २१९ निर्धारण गरेर बिक्री गरिएको टक्सार विभागले जारी गरेको सूचनामा उल्लेख गरिएको छ।

नेपालमा सिक्का उत्पादन गर्न छाडेपनि टक्सार विभागले दसैँ र तिहारको अवसर पारेर असर्फी र चाँदीको सिक्का बनाउने गरेको हो।

तिहारमा १० ग्रामका असर्फी ५ सय वटा, ५ ग्रामका १ हजार वटा र २.५ ग्रामका १ हजार ६ सय वटा गरी ३ हजार १ सय वटा असर्फी बिक्री भएको विभागले जनाएको छ।