काठमाडौं- अर्थमन्त्री डा. प्रकाशशरण महतले बहुउद्देश्यीय टोखा-छहरे सुरुङमार्ग यसै वर्षदेखि निर्माण प्रकृया अघि बढ्ने बताए। नुवाकोट पञ्चकन्या गाउँपालिकाको प्रशासकीय भवन उद्घाटनका क्रममा मन्त्री महतको भनाइ थियो।

 

टोखा-छहरे सुरुङमार्ग नुवाकोटको मात्र आवश्यकता नभइ यो सुरुङमार्ग चीनसँगको व्यापारलाई सहज बनाउने र पृथ्वी राजमार्गलाई जोड्ने भएकाले यो सुरुङमार्गको बहुआयमिक उपयोगिता भएको हुँदा त्यसैले यो नुवाकोटको मात्र पुँजी नभएको मन्त्री महतले बताएको थिए। 

‘यो सुरुङमार्गको धेरै वर्षदेखि चर्चा भएको विषय हो। चर्चा भयो, ठोस पहल भएन। अहिले हामीले ठोस पहल गरेर एक अर्ब बजेट सुनिश्चित गरेका छौं। यद्यपि यसमा विदेशी सहयोग आउने सम्भावना छ’ भवन उद्घाटनका  क्रममा मन्त्री डा. महतले भने, ‘विदेशी सहयोग आओस् नआओस्, यो सुरुङमार्ग निर्माणको प्रकृया हामी अगाडि बढाउँछौँ। यो नुवाकोटको आवश्यकता मात्र होइन, यो देशको आवश्यकता हो।’

अर्थमन्त्री डा. महतले यसै वर्ष सबै काम हुन्छ भन्ने कुरो होइन, सुरुङ मार्ग निर्माण गर्दा धेरै प्राविधिक कुरा पूरा गरेर मात्र अगाडि बढ्ने बताए। तर यो बन्छ भन्ने सन्देश दिनका लागि पनि यो बजेट पहिलो पटक विनियोजन गरिएको छ। अब यसले नुवाकोटको कृषि, उद्योग व्यवसाय, पर्यटनलाई यो सुरुङमार्गलाई ठूलो सहयोग पुर्‍याउँछ। यो निर्माण सम्पन्न हुनका लागि हामीले केही वर्ष पर्खिनु पर्ने महतको भनाइ थियो। 

‘बजेटका विषयमा धेरै चर्चा परिचर्चा भएका छन्। स्रोत जुटाउन कठिन छ हाम्रा लागि, राजस्व कम उठेको थियो, विदेशी सहयोग, आन्तरिक ऋण जोडर बजेट बनाउनुपर्ने हाम्रो बाध्यता थियो। अझ ठूलो बजेट बनाउन प्रधानमन्त्री स्वयम चाहनु हुन्थ्यो, जनताका आवश्यकतालाई बढीभन्दा बढी पूर्ति गर्न सकौं, बाटो गाउँ गाउँमा पुर्‍याउन सकौं भन्ने सबैको चाहना हो। आम्दानी नभइ खर्च गर्न सकिँदैन’ मन्त्री डा. महतको भनाइ थियो।

धेरै समययता नुवाकोटमा अत्यन्तै न्यून बजेट परिरहेको छ। धेरै वर्षपछि यहाँका विकास निर्माणको जुन आवश्यकता थिए, ती आवश्यकता पूर्तिका लागि आगामी वर्षका लागि पर्याप्त बजेट विनियोजन भएको महतले बताए। ‘टोल टोलमा पुग्ने बाटो केन्द्रले बनाउन सक्दैन, त्यसका लागि स्थानीय निकाय र प्रदेशले आफ्नो बजेटबाट प्रवन्ध गर्नुपर्छ। प्रदेशको बजेट पनि आउँदैछ, केन्द्रले राख्न नसकेको ठाउँमा प्रदेशले पनि राख्छ’ महतले भने। 

‘म नुवाकोटकै अर्थमन्त्री परेका कारणले बजेट यो जिल्लामा थोरै बढी परेको छ। त्यो नुवाकोटको आवश्यकता हो। प्रधानमन्त्री, पूर्वप्रधानमन्त्री र अर्थमन्त्रीको जिल्लामा धेरै बजेट गयो भनेर संसददेखि सडकसम्म चर्चा परिचर्चा र बहसको विषय बनेको छ। यद्यपि देशभरि हामीले बजेट पुर्‍याउने प्रयास गरेका छौं’ मन्त्री डा. महतले भने। 

गंगटेदेखि समुन्द्रटार मात्र होइन, थोर्पुभञ्ज्याङसम्म सडक निर्माणका लागि बजेट विनियोजन भएको छ। यसैगरी विभिन्न शीर्षकमा विभिन्न ठाउँलाई त्यहाँको विकासलाई केन्द्रित गरेर बजेट छुट्टाइएको छ। ककनीको बाटोको कुरा पनि समेटिएको छ, त्यहाँबाट पिपलटार-त्रिशुली जाने बाटोको निर्माण व्यवसायी अदालत गएका कारण बजेट विनियोजन गर्न हुन सकेन। 

मन्त्री डा. महतले बजेटको मूल लक्ष्य बनेको देशको अर्थतन्त्रलाई चलायमान बनाउने, राजस्वको आकार बढाउने, त्यसमार्फत् अर्को बर्ष हामीले धेरै बजेट विनियोजन गर्न सकौं र आवश्यकताका आधारमा नुवाकोटले पाउनुपर्ने बजेट यस वर्ष सुनिश्चित भएको उल्लेख गरे।