काठमाडौं- काठमाडौं महानगरपालिकाले इन्द्र सभाको पुनर्निर्माण सम्पन्न गरेको छ।

काठमाडौं महानगरपालिका वडा नं. १९ मा पर्ने यो सभा स्थल इन्द्रजात्रा पर्वसँग सम्बन्धित धार्मिक, सांस्कृतिक, ऐतिहासिक एवं सामाजिक महत्वको ठाउँ हो। पुनर्निर्माणका लागि १ करोड ४६ लाख ५९ हजार ४ सय ५३ रूपैयाँ ४३ पैसा खर्च भएको सम्पदा विभाग तथा पर्यटन विभागका सहायक निर्देशक इन्जिनियर नरेन्द्रमान बज्राचार्यले जानकारी दिए।

२ रोपनी ३ पैसा जग्गामा इन्द्र सभा सभा परिसर पुनर्निर्माणका कार्य भएको हो। सहायक निर्देशक बज्राचार्यका अनुसार ७५ स्क्वायर मिटरमा ठूलो पाटी निर्माण भएको छ।

पुनर्निर्माणका लागि २०७८ कार्तिक ११ गते १ वर्ष अवधि दिएर कार्यादेश दिइएको थियो। तोकिएको समयमा काम नसकिएपछि ६ महिना म्याद थपेर २०८० बैशाख १० गतेसम्म पुर्‍याइएको थियो। थपिएको अवधिमा काम सकिएको हो। 

पुनर्निर्माणका क्रममा २ वटा ठूला प्रवेशद्वार, एउटा ठूलो र एउटा सानो फल्चा (पाटी), दू ब्यंकेगु (नेवार समुदायले मानिसको मृत्युपछि दुःखबाट मुक्त हुन गर्ने संस्कार) घर निर्माण भएका छन्। यस्तै भुइँमा इटा, ढुंगा बिछ्याउने, आकाशे पानी संकलन र पुनभरण प्रणाली जडान लगायत काम भएका छन्।