काठमाडौं- लगातार ओरालो लागेर एक दिन वृद्धि देखिएको सेयर बजारमा पुन: गिरावट देखिएको छ। बुधबार ११.२२ अंकले बढेको बजार बिहीबार पुन: घटेको हो। तीन महिनाअघिको न्यून बिन्दु १८४८ बाट बजार तल लागिरहेको छ।  

बिहीबार ९.८३ अंकले घटेर बजार १८३८.९६ बिन्दुमा झरेको छ। जसमा ६५ करोड ५७ लाख रुपैयाँको मात्रै कारोबार भएको छ। 

तीन महिनायताकै न्यून बिन्दुमा पुगेको सेयर बजारमा बुधबारको कारोबार केही थामिएको थियो। लगातार घट्दो ट्रेन्डमा रहेको बजारले सुधारको बाटो समात्न भने अझै पनि समय लाग्ने विश्लेषकहरूको भनाइ छ। चाडबाड नजिकिएसँगै सेयर बजारमा उत्साह देखिने अनुमान भइरहँदा बजारले उकालो यात्रा तय गर्न कठीन भइरहेको छ। 

यो साता आइतबार ३३.९७ अंकले घटेको बजार मंगलबार ३८.८१ अंकले घटेर बजार १८३७.६० बिन्दुमा झरेको थियो। बुधबार ११.२२ अंकले बढेर बजार १८४८.८२ बिन्दुमा पुगेको थियो।

२०७८ भदौ २ गते अहिलेसम्मकै उच्च बिन्दु ३१९९ मा पुगेर ओरालो यात्रामा लागेपछि सेयर बजार गएको असार ९ गते १८४८ सम्म झरेको थियो। अहिले त्यसभन्दा तल झरेको बजारको उतारचढावपूर्ण अवस्थाले सुधारको स्थायी आधार भेट्न मुस्किल भइरहेको छ। विश्लेषकहरू अहिलेको अवस्था पर्ख र हेरमा नै रहेको र अनुमानभन्दा बाहिर बजार गइरहेको बताउँछन्।