चितवनको राप्ति नगरपालिका मेयर प्रभा बरालसँग स्थानीय पूर्वाधारका विषयमा गरिएको कुराकानीको सारांस

नगरपालिकाको नेतृत्व गरेपछि हालसम्म तपाईंले गरेको महत्वपूर्ण काम के हुन्? 

राप्ती नगरपालिकाको दक्षिणी भेगमा चितवन राष्ट्रिय निकुञ्ज छ । यो नगरपालिकाका लागि गौरवको विषय पनि हो । तर, त्यहाँका जीवजन्तु बस्तीभित्र पसेर स्थानीयको जनधनमा क्षति पुर्याउँदा  वन्यजन्तु– मानिसबीच द्वन्द्व सिर्जना भएको अवस्था थियो । यो समस्या समाधान गर्न त्यस क्षेत्रमा हामीले कंक्रिट वाल बनाउने निर्णय गर्यौँ । स्थानीयको ज्यानको सुरक्षा र खेतीबालीको संरक्षण गर्न कंक्रिट वाल बनाउनुबाहेक अरू कुनै विकल्प थिएन । सोहीअनुसार संघ, प्रदेश र स्थानीय सरकारको समन्वयमा यो परियोजना अघि सारिएको हो । अहिले कंक्रिट वाल निर्माण अन्तिम चरणमा पुगेको छ । 

यो परियोजनाबाट राप्तीको कति जनसंख्या प्रत्यक्ष लाभान्वित हुन्छ ? 

राप्ती नगरपालिकाको दक्षिण भेगमा रहेको वडा नम्बर १, ३ र ६ का बासिन्दालाई प्रत्यक्ष रूपमा लाभ दिएको छ । सँगै सडकमा हिँड्ने बटुवा र छेउछाउका अरू वडाले पनि राहत पाएका छन् । अब अप्रत्यक्ष रुपमा भने धेरै लाभ तथा परिवर्तनका आधार यो पूर्वाधारले तय गर्दछ जस्तो लाग्दछ ।

यो परियोजनामा नगरपालिकाको पनि लगानी छ कि समन्वय मात्र हो ?

यो परियोजनामा नगरपालिकाको प्रत्यक्ष लगानी रहेको छ । नगरपालिकाको ३० प्रतिशत हाराहारी लगानी यस परियोजनामा रहेको छ । लगानीको हिसाबमा भन्ने हो भने हामीले वडा तहसम्मको सहभागिता उक्त परियोजनामा लगाएका छौँ ।

चुनाव बेला स्थानीयलाई यो परियोजना निर्माणको आश्वासन दिनुभएको हो ?

निकुञ्जबाट हात्ती, गैंडा बस्तीमा पसेर जनतालाई दुःख दिएको म आफैँले देखेकी छु । जनताले पाएको दुःख र भोगेका कष्ट आफैँले नजिकबाट महसुस गरेकी छु । भोट माग्न जाँदा गरेका प्रतिबद्धता एकातर्फ राखेर भन्ने हो भने जनताले भोगेका कष्ट हटाउनु नै हाम्रो पहिलो प्राथमिकता हो । त्यसका लागि हामी लागिपरेका छौँ । 
 
तपाईंले यो परियोजनाबाट अरू कुनै लाभ देख्नुभएको छ ? 
कंक्रिट वाल बनेपछि यो बहुउपयोगी हुने देखेका छौँ । विद्यार्थीका लागि यो वाल निकुञ्जको अध्ययन र अवलोकनमा उपयोग गर्न सकिन्छ । कंक्रिट वाल पूरा भएपछि त्यहाँका सबै भित्तामा विभिन्न जनावरका चित्र बनाएर भित्तालाई नै पूरै निकुञ्जको तस्बिरको रूपमा प्रस्तुत गर्न सकिन्छ । छेउका घरमा होमस्टे पनि सञ्चालन गर्न सकिने भयो । त्यसका लागि हामीले पहल गर्नेछौँ । 

परियोजना बनाउनमा निर्माण व्यवसायीबाट कत्तिको सहयोग पाउनुभएको छ ?

यो परियोजना हामीले खण्ड–खण्डमा विभाजन गरेर निर्माण व्यवसायीलाई जिम्मा लगाएका छौँ । कुनै स्थानमा निर्माण व्यवसायीको ढिलासुस्ती देखिएको छ भने कतै स्थानीयले नै जमिनका कारण अवरोध गरेको पाइएको छ । तर, चाँडै परियोजना सम्पन्न हुनेमा विश्वस्त छौँ ।