काठमाडौं- काठमाडौं भृकुटिमण्डपमा रहेको 'फन पार्क'ले २०७२ सालदेखि कर नतिरेको भन्दै महानगरपालिकाले कर तिर्नका लागि २४ घण्टाको समय दिएको छ। 

व्यवसाय र बहाल कर सम्बन्धित वडा कार्यालयमा साथै विज्ञापन तथा मनोरन्जन कर महानगरपालिकाको राजस्व विभागमा गएर २४ घण्टाभित्र तिर्न निर्देशन दिइएको हो। महानगरपालिकाले तिर्न बाँकी सम्पूर्ण रकम र लाग्ने अन्य जरिवानासमेत दाखिला गर्न भनेको छ।

काठमाडौं महानगरपालिका राजस्व विभाग प्रमुख शिवराज अधिकारीका अनुसार फनपार्कले बहाल रकममा सम्झौताको वार्षिक १० प्रतिशत, मनोरञ्जन करतर्फ ५ प्रतिशत, व्यवसायतर्फ २० हजार रुपैयाँ र त्यसको जरिवाना बुझाउनुपर्छ। विज्ञापन करतर्फ बाह्य विज्ञापनतर्फ प्रति स्क्वायर फिट १ हजार रुपैयाँ बुझाउनुपर्छ। 

तोकिएको समयभित्र नबुझाएमा फनपार्क शिलबन्दी गर्ने चेतावनी महानगरले दिएको छ।

समाज कल्याण परिषद्‍को जग्गा भाडामा लिएर वर्षौंदेखि व्यवसाय गर्दै आएको फनपार्क पूर्वश्रमराज्यमन्त्री एवं मेनपावर व्यवसायी टेकबहादुर गुरुङले सञ्चालन गर्दै आएका छन्।