.jpg)
.gif)
.gif)
भक्तपुर- भक्तपुरको मनोहरा खोला किनारस्थित सुकुम्बासी बस्तीमा अनधिकृत रूपमा बनाइएका घरटहरा हटाउने क्रममा सुकुम्बासी बस्तीका बासिन्दाको आक्रमणबाट २२ सुरक्षाकर्मी घाइते भएका छन्। साँझ परेपछि सुकुम्बासी बस्तीमा सुरक्षाकर्मीले डोजर प्रयोग गरी सात पक्की घर भत्काएपछि नेपाल प्रहरी र सशस्त्र प्रहरीमाथि आक्रमण भएको थियो।
.gif)
जिल्ला प्रहरी परिसर भक्तपुरका प्रमुख एवं प्रहरी उपरीक्षक सूर्यबहादुर खड्काले मनोहरा सुकुम्बासी बस्तीमा घर भत्काउने क्रममा सुरक्षाकर्मीमाथि ढुंगा, इँटा र बोतल प्रहार भएको जानकारी दिए।
.gif)
.gif)
उनले भने, 'मनोहराका ८० प्रतिशत सुकुम्बासीले दिउँसै सामान लगिसकेका थिए, थापाथली र ग्रैह्रीगाउँको सुकुम्बासी बस्ती हटाएर डोजरसहितको टोली मनोहरा ल्याएपछि यहाँका संरचना भत्काउन थालिएको हो, प्रहरीले कुनै बल प्रयोग नगरी सामान सार्नेलाई सहयोग गर्दै घर भत्काउने क्रम सुरु भयो, पक्की घर भत्काउने क्रममा रातिको समयमा सुरक्षाकर्मीमाथि एकसाथ ढुंगा, इँटा र बोतल प्रहार भयो।'
आक्रमणमा परी मध्यपुरथिमि प्रहरी बृत्तका प्रहरी नायब उपरीक्षक नवराज ढुंगानासहित ११ प्रहरी घाइते भएका छन्। त्यसैगरी, आक्रमणमा सशस्त्र प्रहरी बल नं २२ दुवाकोटबाट खटिएका सशस्त्र प्रहरीका थप ११ जना घाइते भएका सशस्त्र प्रहरी उपरीक्षक वासुदेव महतले जानकारी दिए। आइतबार बिहानैदेखि फेरि संरचना भत्काइने उनले बताए।
मनोहरा सुकुम्बासी बस्तीमा ७७७ घरटहरा रहेका छन्। बस्तीका सुनिल लामाले बस्ती छाड्दै गर्दा भने, 'यहाँ अधिकांश घर भाडामा लगाइएका छन्, यहाँ सुरुमै टहरा बनाएर एक समूहले तीन लाखदेखि सात लाखसम्म तथा पक्की घर १८ लाख रुपैयाँसम्ममा बिक्री गरेका छन्। हामी पनि टहरा किनेर बसेको १५ वर्ष भयो। सरकारले हामीजस्ता सुकुम्बासीलाई उचित व्यवस्थापन गरोस्, त्यति भए पुग्छ।'
सुकुम्बासी बस्तीका बासिन्दासँग भाडा उठाउन कही व्यक्ति नियमित आउने गरेका बताइएको छ। बस्तीका धेरैले भाडा तिर्ने गरेका छन्। रासस
