.jpg)
.gif)
.gif)
झापा- नेपालमा उत्पादित छुर्पीको निर्यात ३२ प्रतिशतले वृद्धि भएको मेची भन्सार कार्यालयले जनाएको छ। चालु आर्थिक वर्ष २०८२/८३ को पाँच महिनामा पूर्वी नाका काँकरभिट्टा हुँदै ४८ करोड ५२ लाख ७३ हजार रुपैयाँबराबरको दुई लाख ७५ हजार २४६ केजी छुर्पी निर्यात भएको मेची भन्सार कार्यालयका सूचना अधिकारी ईश्वरकुमार हुमागाईँले जानकारी दिए।
.gif)
गत आर्थिक वर्ष २०८१/८२ को सोही अवधिको तुलनामा चालु आर्थिक वर्षमा ३२ प्रतिशतले निर्यात बढेको हो। गत आवको साउनदेखि मंसिरसम्ममा ३६ करोड ७६ लाख २३ हजार रुपैयाँबराबरको दुई लाख १७ हजार ६८ केजी छुर्पी निर्यात भएको उनले बताए।
.gif)
.gif)
गत आर्थिक वर्षको तुलनामा चालु आर्थिक वर्षमा छुर्पीको निर्यात११ करोड ७६ लाख ५० हजार रुपैयाँले बढेको जनाइएको छ। नेपाली छुर्पी निर्यात हुने मुख्य नाका नै काँकरभिट्टा हो। मेची भन्सारबाट निर्यात हुने प्रमुख १० मालवस्तुको सूचीमा छुर्पी चौथो स्थानमा छ।
पहाडी तथा हिमाली जिल्लामा दुग्धजन्य वस्तुबाट छुर्पी उत्पादन हुन्छ। निर्यात भएर अधिकांश छुर्पी युरोप र अमेरिका पुग्ने गरेको छ। ती मुलुकमा यसलाई कुकुर र बिरालोको खानाका रूपमा प्रयोग गर्छन्।
नेपाल छुर्पी व्यवसायी संघका महासचिव ऋषि तिम्सिनाले नेपालमा उत्पादन हुने छुर्पीको ८० प्रतिशत हिस्सा कोशी प्रदेशले ओगटेको बताए। नेपालबाट निर्यात हुने प्रमुख उत्पादन छुर्पीको उत्पादन र व्यवसाय प्रवर्द्धनका लागि सरकारले ध्यान दिन नसकेको महासचिव तिम्सिनाले गुनासो गरे। रासस
