कञ्चनपुर- भारतमा मजदुरी गरेर परिवारको जोहो गर्दै आएका कञ्चनपुरको शुक्लाफाँटा नगरपालिका-१२ का शिवचरण राना अहिले आफ्नै गाउँमा दूध बिक्रीबाट मनग्य आम्दानी गरिरहेका छन्। मजदुरी गर्दा अनेक दुःख भोगेका राना गाउँमा नै केही गर्ने योजना बनाएर भारत छोडेर स्वदेश फर्किएका हुन्।

कुनै बेला भारतमा मजदुरी गर्ने राना अहिले गाउँमा डेरीका मालिक बनेका छन्। मजदुरी छोडेर मालिक बन्न रानाले धेरै मेहनत र संघर्ष गर्नुपर्‍यो। विसं २०६८ देखि साइकलमा दूध संकलन गरेर बिक्री गर्न सुरु गरेका उनी अहिले डेरी मालिक बन्न सफल भएका छन्। 

रानाले दुई लिटर दूधबाट व्यवसाय सुरु गरेका छन्। अहिले उनले दैनिक एक हजार ५०० लिटर दूध संकलन गरेर बिक्री गर्दै आएका छन्। 

'भारतमा मजदुरी गर्दा अनेक दुःख पाइयो, गाउँ फर्किएर साइकलमा दूध बिक्री गर्न थालेँ,' रानाले भने, 'यसैबाट कमाएको रकम बचत गरेपछि अहिले आफ्नै डेरी व्यवसायसमेत सञ्चालन गरेको छु।'

सुरुवातमा साइकलमा दूध संकलन गर्दै हिँड्ने रानाले आफूलाई स्थापित गर्न धेरै संघर्ष गरे। त्यही लगन र परिश्रमले उनी राम्रो आम्दानीसँगै सफल व्यवसायी समेत बने। गाउँगाउँबाट दूध संकलन गरेर रानाले स्थानीय झलारी बजार, अत्तरिया र कैलालीमा बिक्री गर्दै आएका छन्। दूध बोक्न ६ जनालाई मासिक २० हजारदेखि २६ हजार रूपैयाँसम्म तलब दिएर उनले कामदार राखेका छन्। 

'दुई लिटर दूधबाट सुरु गरेको थिएँ, बिस्तारै दूध बढी संकलन हुन थाल्यो,' उनले भने, 'अहिले एक हजार ५०० लिटर दूध संकलन हुन्छ।'

यसै व्यवसायबाट रानाले करिब ९० लाख रूपैयाँबराबरको सम्पत्तिसमेत जोडेका छन्। 'दूध बिक्रीबाट अहिले सबै खर्च कटाएर वार्षिक १३ लाख रूपैयाँसम्म आम्दानी हुने गरेको छ,' रानाले भने, 'यसबाट म एकदमै खुसी छु, अहिले छोरालाई पनि यसै व्यवसायमा लगाएको छु।'

पछिल्लो समय स्वदेशमा रोजगारी नभएको भन्दै थुप्रै युवा विदेश पलायन भइरहेका छन्। तर विदेशमा गरिने दुःखभन्दा आफ्नै भूमिमा केही गर्नुपर्छ भन्दै फर्किनेहरु पनि थुप्रै छन्। विदेशको जागिर छोडेर आफ्नै गाउँघरमा कडा परिश्रम गरेका रानाको सफलता लोभलाग्दो छ। उनी अहिले समाजमा उदाहरणीय व्यक्ति बनेका छन्। रासस