इलाम- इलाम सदरमुकामदेखि झापाको विर्तामोड जोड्ने छोटो दुरीको केचना-कञ्चनजंघा ‍‍(मेची कोरिडोर) सडकअन्तर्गत पुवा खोलामा बेलिब्रिज निर्माण भएको छ। सो बेलिब्रिज निर्माण पश्चात मेची राजमार्गको विकल्प खुलेको छ।

इलाम नगरपालिका-९ र ११ जोड्ने पुवा खोलमा पहिलो पटक बेलिब्रिज निर्माण भएपछि स्थानीय बासिन्दा र झापा-इलाम-पाँचथर-ताप्लेजुङ आवतजावत गर्ने सवारीसाधनका लागि छोटो र सुरक्षित बाटोको विकल्प खुला भएको हो।

सागर, सुभारम्भ र एरिसाको जाेइन्ट भेन्चर (जेभी) निर्माण कम्पनीले सो बेलिब्रिज निर्माण गरेको हो। पुल नहुँदा विगतमा यात्रीहरुले जोखिम मोलेर यात्रा गर्नुपर्ने बाध्यता थियो। विशेष गरी वर्षायाममा सडक पूर्णरुपमा बन्द हुने गर्दथ्यो।

संघीय सरकारको एक करोड ३५ लाख रुपैयाँमा बेलिब्रिज निर्माण गरिएको हो। बेलिब्रिज ४८.६ मिटर लम्बाइको भएको सडक डिभिजन इलामका सूचना अधिकारी इन्जिनियर अर्जुन घिमिरेले बताए। इलाम नगरपालिका-९ का वडाध्यक्ष गोपाल चहानले बेलिब्रिज निर्माणसँगै झापा-इलाम सवारी आवागमनमा सहजता आएको बताए।

‘पहिले हिउँदमा त सडक प्रयोगमा आउँथ्यो, तर वर्षायाममा पूरै बन्द हुने गर्थ्यो’, उनले भने, ‘बेलिब्रिज निर्माणले बाह्रै महिना सवारी आवागमनमा सहज हुने भएको छ।’ गतवर्ष पहिरोका कारण दुई साता राजमार्ग बन्द हुँदा यात्रीहरुले ठूलो सास्ती खेपेका थिए।

त्यतिबेला वैकल्पिक सडक नहुँदा ताप्लेजुङ, पाँचथर र इलामबाट झापा झरेका यात्रुहरु माईखोला वरिबाट पारीसम्म पैदल र झापाबाट इलाम, पाँचथर र ताप्लेजुङ आएका यात्री पारीबाट वरिसम्म पैदल हिँडेर गाडी परिवर्तन गरेर गन्तव्यमा पुग्न बाध्य भएका थिए। 

हाल पुवा खोलामा बेलिब्रिज निर्माण भएसँगै मेची राजमार्गको गोलाखर्क खण्डबाट सिधैँ केचना-कञ्चनजंघा सडक प्रयोग गर्दा ४७ किलोमिटरको दुरीमा झापाको विर्तामोड पुग्न सकिन्छ। मेची राजमार्ग प्रयोग गर्दा ८३ किलोमिटर दुरीमा मात्र विर्तामोड पुग्न सकिन्छ।

मेची राजमार्गको वैकल्पिक सडकको रुपमा लिइएको सो सडकअन्तर्गत इलाम खण्डको माई नगरपालिका क्षेत्रमा १५ किलोमिटर सडक कालोपत्र भइसकेको छ। बाँकी १७ किलोमिटर खण्डमध्ये १४ किलोमिटर ठेक्का लागेर निर्माण भइरहेको सडक डिभिजन प्रमुख इन्जिनियर पवन भट्टराईले बताए। रासस