जुम्ला- यहाँका आठवटै स्थानीय तहले आर्थिक वर्ष २०८२/८३ का लागि बजेट ल्याएका छन्। ती सबै स्थानीय तहले रैथाने बाली संरक्षणदेखि शिक्षा, स्वास्थ्य, कृषि, सञ्चार, खानेपानी र बेरोजगार युवालाई रोजगारलगायतका कार्यक्रम बजेटमा समेटेका छन्।

जिल्लाको तिला गाउँपालिकाले आगामी आवका लागि ५१ करोड ३९ लाख ७९ हजार रूपैयाँ बराबरको आय-व्यय अनुमानसहितको बजेट सार्वजनिक गरेको छ। गाउँपालिकाका उपाध्यक्ष एवं कार्यक्रम तथा बजेट तर्जुमा समितिका संयोजक गोरीकला बुढाका अनुसार स्वास्थ्य, शिक्षा, कृषि, पर्यटन र पूर्वाधारलाई प्राथमिकतामा राखेर नीति तथा कार्यक्रम र बजेट ल्याइएको छ। सुलभ स्वास्थ्य सेवा विस्तार गर्न १० शय्याको अस्पताल निर्माणलाई तीव्रता दिइने नीति तथा कार्यक्रममा समावेश गरिएको उपाध्यक्ष बुढाले जानकारी दिइन्।

यस्तै, सिञ्जा गाउँपालिकाले ४७ करोड २३ लाख रूपैयाँको बजेट प्रस्तुत गरेको छ। बजेट बेहोर्ने स्रोतका रूपमा आन्तरिक राजस्व, अन्तरसरकारी राजस्व बाँडफाँट तथा संघ र प्रदेशबाट प्राप्त अनुदानलाई आधार बनाएर बजेट सार्वजनिक गरेको गाउँपालिकाका अध्यक्ष पूर्णप्रसाद धितालले जानकारी दिए। तातोपानी गाउँपालिकाले ५१ करोड ५९ लाख रूपैयाँको बजेट ल्याएको छ।

त्यसैगरी, गुठीचौर गाउँपालिकाले ३४ करोड ७९ लाख रूपैयाँको बजेट प्रस्तुत गरेको छ भने कनकासुन्दरी गाउँपालिकाले ४९ करोड ७१ लाख ७३ हजार रूपैयाँ र पातारासी गाउँपालिकाले ४३ करोड ५८ लाख रूपैयाँ बजेट ल्याएको छ। विशेषगरी भौतिक पूर्वाधार निमार्णमा प्राथमिकता दिएर बजेट विनियोजन गरिएको पातारासी गाउँपालिकाले जनाएको छ।

जिल्लाको एक मात्र नगरपालिका चन्दननाथ नगरपालिकाले ६१ करोड ३२ लाख बजेट प्रस्तुत गरेको नगर उपप्रमुख रामदेवी खड्काले जानकारी दिइन्। नीति तथा कार्यक्रममा व्यवस्थित सहरीकरण, वातावरण संरक्षण तथा विपद् व्यवस्थापन, फोहरमैला व्यवस्थापन र खानेपानी प्राथमिकतामा राखिएको नगरपालिकाले जनाएको छ।

यस्तै, गुठीचौर, पातारासी, कनकासुन्दरी र तातोपानी गाउँपालिकाले पनि कृषि, सञ्चार तथा स्वास्थ्य र भौतिक पूर्वाधार निर्माणलाई प्राथमिकतामा राखेर नीति तथा कार्यक्रम र बजेट ल्याएका छन्। कम्तीमा एकपटक पालिकास्तरमा निःशुल्क स्वास्थ्य शिविर सञ्चालन गरिने भएको छ।

विशेषज्ञसहित निःशुल्क स्वास्थ्य शिविर र ज्येष्ठ नागरिक, बालबालिका तथा गर्भवतीको नियमित स्वास्थ्य परीक्षणको प्रभावकारी व्यवस्था मिलाइने तातोपानी गाउँपालिकाका अध्यक्ष नन्दप्रसाद चौलागाईँले जानकारी दिए। पालिकाले स्वास्थ्यसँगै शिक्षा क्षेत्रलाई पनि प्राथमिकतामा राखेको छ।

सीपमूलक र व्यावहारिक शिक्षासहित सुविधासम्पन्न ईसीडी कक्षा व्यवस्थापन, जीवनउपयोगी शिक्षा, एक वडा एक खेलकुद मैदान निर्माण, विद्यालयको सुन्दरता र हराभरा विद्यार्थीको सक्रिय सहभागितालगायत कार्यक्रम नीति तथा कार्यक्रममा समावेश गरिएको सिञ्जा गाउँपालिकाका अध्यक्ष धितालको भनाइ छ। गाउँपालिकाले पर्यटन क्षेत्रको विकासका लागि प्राथमिकताका साथ योजना ल्याएको छ।

सेवा प्रवाह जनताको घरदैलोमा पुर्‍याउन एकीकृत घुम्ती सेवामार्फत सेवा प्रवाह गर्ने र करको दर घटाउँदै करको दायरा विस्तार गर्ने योजना तिला गाउँपालिकाले नीति तथा कार्यक्रममा उल्लेख गरेको छ। तिलाले सार्वजनिक गरेको नीति तथा कार्यक्रममा गाउँपालिकाले गौरवका योजना र ऐतिहासिक सम्पदामा जोड समेत दिएको छ।

आफ्नो गौरवका योजनाअन्तर्गत ऐतिहासिक सम्पदा पुनःनिर्माण, पर्यटकीय पदमार्ग निर्माण, पहिरो नियन्त्रण, सौन्दर्यकरण, खुला क्षेत्रको संरक्षण, शिक्षा, स्वास्थ्य, खेलकुद र रोजगार अभिवृद्धिमा प्राथमिकता दिइएको छ। नीति तथा कार्यक्रम कार्यान्वयनका लागि प्रस्तुत बजेटमार्फत दिगो विकास, सामाजिक समावेशीकरण, आर्थिक समृद्धि र प्रशासकीय सुशासनमा योगदान पुग्ने विश्वास व्यक्त गरिएको छ।

आर्थिक स्रोत परिचालनमा नगरको सञ्चिति कोष, आन्तरिक राजस्व र अनुदानलाई अधिकतम उपयोग गर्ने प्रतिबद्धता व्यक्त गरिएको छ। आन्तरिक आय र बाह्य स्रोत परिचालन गरी आगामी वर्ष पालिकाको सेवा प्रवाह, पूर्वाधार निर्माण, सामाजिक सुरक्षालगायत क्षेत्रलाई प्रभावकारी बनाइने नीति तथा कार्यक्रम ल्याएको तिलाका प्रमुख प्रशासकीय अधिकृत जानकी हितानले बताइन्। रासस