बरहथवा- सर्लाहीको बागमती नगरपालिकाले आगामी आर्थिक वर्षको लागि एक अर्ब तीन करोड २६ लाख नौ हजार ३७६ रूपैयाँ बराबरको बजेट सार्वजनिक गरेको छ।

मंगलबार नगरपालिकाको दोस्रो नगरसभाको सातौँ अधिवेशनमा कार्यवाहक उपप्रमुख रूपा बोम्जनले उक्त बजेट पेस गरिन्। नगरको कृषि, पर्यटन, स्वास्थ्य र शिक्षालाई प्राथमिकतामा राखेर बजेट तथा कार्यक्रम तयार पारिएको नगरका कार्यवाहक नगरप्रमुख कृष्णकुमार लामाको भनाइ छ।

आगामी आव २०८२/८३ का लागि कुल बजेटमध्ये व्यय १० करोड ४६ लाख, पुँजीगत तथा कार्यक्रमतर्फ ७० करोड ५० लाख नौ हजार ३७६, सशर्त अनुदानतर्फ २१ करोड ४३ लाख, विशेष अनुदानतर्फ ८७ लाख रूपैयाँ अनुमान गरिएको कार्यवाहक उपप्रमुख बोम्जनले जानकारी दिइन्।

अनुमानित खर्चको स्रोत नेपाल सरकार अनुदान, राजस्व बाँडफाँट, प्रदेश सरकार अनुदान, आन्तरिक आय तथा नगर विकास कोष र निजी क्षेत्र गैरसरकारी संस्थाहरू अनुमान गरिएको उनले उल्लेख गरिन्। कृषि क्षेत्रतर्फ नगरपालिकाले यहाँ उत्पादन हुने अन्नको भण्डार निर्माणलाई पनि प्राथमिकता दिएको उनको भनाइ छ।

नगरभित्र उत्पादन भएका तरकारी संकलनको दिगो व्यवस्थापनका लागि सखुवनीमा संरचना निर्माणका लागि दुई करोड ८० लाख रूपैयाँ बजेट विनियोजन गरिएको छ। नगरमा रहेका ३५ बढी धार्मिकस्थल र नगरले निर्माण गरिरहेको बागमती माछापोखरी (भरत ताल) लाई महत्वपूर्ण पर्यटकीय गन्तव्यका रुपमा विकास गर्नेगरी कार्यक्रम तयार गरिएको बोम्जनले जानकारी दिइन्।

नगरपालिकाले अस्तित्वमा रहेका र लोपोन्मुख तथा प्रचलित भाषा संस्कृति संरक्षणको लागिसमेत कार्यक्रम तयार गरी सभाबाट अनुमोदन गरेको नगरपालिकाका निमित्त प्रमुख प्रशासकीय अधिकृत प्रतीक भण्डारीले जानकारी दिए। रासस