काठमाडौं- महालक्ष्मी लाइफ इन्स्योरेन्स कम्पनीले ६० लाख कित्ता आईपीओ निष्कासन गर्ने भएको छ। कम्पनीले १०० रुपैयाँ अंकित ६० करोड रुपैयाँ बराबरको ६० लाख कित्ता आईपीओ निष्कासन प्रक्रिया सुरु गरेको हो।

आईपीओ निष्कासन गर्नका लागि कम्पनीले बिक्री प्रबन्धकमा सानिमा क्यापिटललाई नियुक्त गरेको छ। सोमबार बिक्री प्रबन्धक सम्झौतामा कम्पनीका सीईओ रमेशकुमार भट्टराई र क्यापिटलको तर्फबाट भिष्मराज चालिसेले हस्ताक्षर गरेका हुन्। 

कम्पनीले हालसम्ममा ६३ वटा शाखाहरुबाट बीमा सेवा प्रदान गर्दै आएको छ। हाल कम्पनीको चुक्तापुँजी १ अर्ब ४० करोड रुपैयाँ रहेको छ। आईपीओ निष्कासनपछि कम्पनीको चुक्तापुँजी २ अर्ब रुपैयाँ पुग्नेछ। अब कम्पनीले आवश्यक प्रक्रिया पूरा गरेर नियामक नियामक निकाय नेपाल धितोपत्र बोर्डमा निवेदन दिएर स्वीकृति पाएपछि मात्र आईपीओ निष्कासन गर्नेछ। 

कम्पनीले चालु आवको दोस्रो त्रैमाससम्ममा ५ करोड ३० लाख नाफा कमाएको छ भने कुल ६९ करोड ८५ लाख रुपैयाँ  बीमा शुल्क आर्जन गरेको छ।