काठमाडौं- परराष्ट्रमन्त्री डा आरजु राणा देउवाले वर्तमान सरकारको प्राथमिकता राजनीतिक स्थायित्व प्रदान गरी  यसैका माध्यमबाट आर्थिक विकास गर्नु रहेको बताएकी छिन्।

धनगढीमा आयोजित सुदूरपश्चिम प्रदेश लगानी तथा विकास तयारी सम्मेलनमा मन्त्री राणाले भनिन्, 'मुलुक राजनीति अस्थिरताको बन्दी बनेपछि स्थायित्व प्रदान गर्न दुई प्रमुख दल कांग्रेस र एमालेको सरकार बनेको हो। त्यसैले यो सरकारको प्राथमिकता स्थायित्व, आर्थिक विकास र शान्ति हो।'

मन्त्री राणाले कुनै पनि देशमा स्वदेशी तथा वैदेशिक लगानीका लागि सबैभन्दा पहिला राजनीतिक स्थायित्व र शान्तिको वातावरण आवश्यक पर्ने भएकाले यसैका लागि वर्तमान सरकार कार्यरत रहेको धराणा पनि राखिन्।

कानूनमा सुधार गरेर हुन्छ या नयाँ नीति नियमहरु निर्माण गरेर लगानीमैत्री वातावरण निर्माण गरी स्वदेशी तथा विदेशी लगानी प्रवर्द्धनमा वर्तमान सरकार लागेको पनि उनले बताइन्।

मन्त्री राणाले सरकारको आर्थिक विकासको एजेण्डालाई थप प्रवर्द्धन गर्न आफूले परराष्ट्र मन्त्रालयमा अलग्गै आर्थिक कूटनीति महाशाखाको स्थापना गरेर कूटनीतिका माध्यमबाट विदेशी लगानी भित्र्याउने कामका लागि सहजीकरण गरिरहेको जानकारी पनि दिइन्।

यस्तै, उनले कुनै पनि देशको आर्थिक विकासको इञ्जिन भनेको निजी क्षेत्र हो भन्ने मान्यतामा वर्तमान सरकार र आफ्नो पार्टी नेपाली कांग्रेस रहेको स्पष्ट गर्दै लगानीमैत्री नीति तथा कानूनहरु निर्माण गरेर बढीभन्दा बढी लगानीका लागि निजी क्षेत्रलाई प्रोत्साहित गर्ने नीति सरकारले लिएको पनि बताइन्।

उनले भनिन्, 'जुनसुकै लगानीका लागि पनि राजनीतिक स्थायित्व र शान्तिको वातावरण आवश्यक पर्दछ, यो स्वाभाविक हो। त्यस्तै, कुनै पनि देशमा विदेशी लगानीकर्ताहरुलाई आकर्षित गर्न स्वदेशी लगानीकर्ताहरुलाई पनि उचित वातावरण आवश्यक पर्दछ। यो वास्तविकता बुझेर वर्तमान सरकारले काम गरिरहेको छ।'

मन्त्री राणाले सुदूरपश्चिम पर्यटन, संस्कृति, कृषि उपजलगायतका धेरै क्षेत्रमा धेरै सम्भावना बोकेको प्रदेश हो भन्दै सो क्षेत्रमा बढीभन्दा बढी लगानी गरेर मुनाफा लिन निजी क्षेत्रलाई आह्वान पनि गरिन्।

साथै मन्त्री डा राणाले आफ्ना क्षेत्रमा ठूलो लगानी भित्र्याउनका लागि प्रदेश सरकार तथा स्थानीय नागरिकहरु पनि आफ्ना ठाउँबाट सशक्तरुपमा लाग्नुपर्ने धारणा राखिन्।

उनले भनिन्, 'यस क्षेत्रको विकासका लागि सबै एकजुट भएर लागौँ। विकासमा राजनीति शोभनीय हुँदैन। राजनीतिलाई आफ्ना ठाउँमा राखौँ र आफ्ना क्षेत्रको विकासका लागि एकमत बनाएर लागौँ।'