काठमाडौं- प्रविधि कम्पनी ब्ल्याकभ्यूले नेपाली बजारमा नयाँ ट्याब्लेट ब्ल्याकभ्यू ट्याब मेगा २ सार्वजनिक गरेको छ। 

ट्याब मेगा २ मा १२ इन्चको एचडी+ आईपीएस डिस्प्ले दिइएको छ, जसले १२०० x २००० पिक्सेलको रिजोलुसन र ६० हर्ट्जको रिफ्रेस रेट सपोर्ट गर्छ। युनिसक टाइगर टी६१५ अक्टा-कोर प्रोसेसरद्वारा सञ्चालित यस उपकरणमा ८ जीबी वा १२ जीबी र्याम र २५६ जीबी आन्तरिक स्टोरेज विकल्प उपलब्ध छन्। आवश्यकता अनुसार स्टोरेज २ टेराबाइटसम्म विस्तार गर्न सकिने सुविधा पनि छ।

शक्तिशाली ९,००० एमएएच क्षमताको ब्याट्रीसहित आएको ट्याब्लेटले १८ वाट फास्ट चार्जिङ समर्थन गर्छ। क्यामेरातर्फ, यसमा १६ मेगापिक्सेल रियर क्यामेरा र ८ मेगापिक्सेल फ्रन्ट क्यामेरा जडान गरिएको छ।

प्रयोगकर्ताको अनुभवलाई अझ सहज बनाउन ट्याब्लेटमा एन्ड्रोइड १५ मा आधारित डोक ओएस ५.० प्रयोग गरिएको छ। साथै, डुअल-बक्स स्पिकर, वाइडभाइन एल१ सपोर्ट (अनलाइन स्ट्रिमिङका लागि), र डुअल ४जी सिम स्लटको सुविधा समेत दिइएको छ।

नेपालमा ब्ल्याकभ्यू ट्याब मेगा २ को मूल्य ३१ हजार ९९९ रुपैयाँ निर्धारण गरिएको छ।