बागलुङ- जिल्लाको बडिगाड गाउँपालिका-७ भिमगिठे र ९ को मालारानी जोड्ने गरी मोटरेवल पुल निर्माण भएको छ। ५ वर्ष अगाडि निर्माण सुरु भएको उक्त पुल अघिल्लो महिनादेखि सञ्चालनमा आएको हो।

पुल सञ्चालनमा आएपछि राष्ट्रिय गौरवको आयोजना मध्यपहाडी लोकमार्गदेखि मालारानीसहित राजकुट, प्युठान र गुल्मी आउजाउ गर्न सहज भएको छ। २०७७ कात्तिक २७ गते सडक डिभिजन कार्यालयले ७ करोड ६६ लाखमा निर्माण कम्पनीलाई ठेक्का दिएको थियो। 

२०७९ फागुनमा निर्माण सम्पन्न गर्नेगरी ठेक्का दिइएकामा ३ वर्षपछि मात्र निर्माण सम्पन्न भएको हो। पर्याप्त बजेट प्राप्त नहुँदा समयमै काम सम्पन्न नभएको सडक डिभिजन कार्यालयका सूचना अधिकारी विष्णुप्रसाद लामिछाने बताउँछन्। नवनिर्मित पुल मालारानीबाट राजकुट-हर्पे-देवीस्थान रोल्पा-रुकुम-जाजरकोट आवागमन सहज भएको छ।

स्थानीय प्रेमबहादुर केसीले बडिगाडखोलामा पुल बनेपछि गाउँमा उत्पादन बजारीकरण गर्न सहज भएको बताए। गाउँमा धेरै किसानले फलफूल र सागसब्जी उत्पादन गरेपनि अब डोकोमा बोकेर बजार पुर्याउनुपर्ने बाध्यता अन्त्य भएको उनको भनाइ छ। रासस