काठमाडौं- नेपालमा हालसम्म करिब २ लाख संख्या कुष्ठरोगका बिरामी रहेका स्वास्थ्य तथा जनसङ्ख्या मन्त्रालयले जनाएको छ। नेपालले वि.सं. २०६६ मा विश्व स्वास्थ्य संगठनको मापदण्डबमोजिम कुष्ठरोगलाई जनस्वास्थ्य समस्याका रूपमा नरहेको घोषणा गरिसकेको छ। कुष्ठरोग उल्मूलनसम्बन्धी विश्वव्यापी लक्ष्यअनुरुप नेपालले सन् २०३० भित्र कुष्ठरोग उल्मूलन गर्ने प्रतिबद्धता व्यक्त गरेको छ।

उक्त लक्ष्य पूरा गर्न स्वास्थ्य तथा जनसङ्ख्या मन्त्रालय प्रयासरत छ। विगत १० वर्षयत प्रत्येक वर्ष औषतमा २ हजार ८६७ जनाका दरले नयाँ बिरामी फेला परेका मन्त्रालयले जनाएको छ। नेपालमा १८ जिल्लामा मापदण्डभन्दा बढी अर्थात् प्रति १० हजारमा एकजना कुष्ठरोगी फेला परिरहेका स्वास्थ्य  मन्त्रालयका सचिवले डा. विकास देवकोटा बताउँछन्। उनका अनुसार सबैभन्दा बढी मधेस प्रदेशमा र सबैभन्दा कम गण्डकी प्रदेशमा भेटिएका छन्।

मुलुकका ७७ जिल्लामध्ये १८ जिल्ला कुष्ठरोगको उच्च जोखिममा रहेकाले यसको उल्मूलन चुनौतीपूर्ण देखिएको उनले बताए। नेपालमा कुष्ठरोगका कारणले झण्डै २ लाख जना व्यक्ति प्रभावित भएको जनाउँदै सचिव देवकोटाले त्यसमध्ये करिब ३० हजार अपांगता भएका व्यक्ति रहेका अनुमान गरिएको बताए। नेपालमा कुष्ठरोग प्रभावित व्यक्ति र तिनका परिवारका सदस्यको आर्थिक स्थिति चिन्ताजनक रहेको मन्त्रालयका अधिकारहरू बताउँछन्। 

प्रभावित व्यक्तिमध्ये कम संख्याले रोजगारी प्राप्त गरेका छन् भने रोजगारीका लागि आवश्यक पर्ने सीप र अनुभव नभएका व्यक्ति बढी छन्। विश्व स्वास्थ्य संगठन तथा अन्य संघ, संघसस्थासँगको सहकार्यमा मन्त्रालयको स्वास्थ्य विभागअन्तर्गत इपिडिमियोलोजी तथा रोग नियन्त्रण महाशाखा मातहत रहेको कुष्ठरोग नियन्त्रण तथा व्यवस्थापन शाखाबाट कुष्ठरोगको उल्मूलन गर्ने कार्यक्रम सञ्चालन भइरहेको छ। संघीय सरकारबाट जारी भएको राष्ट्रिय कुष्ठरोग रणनीति (२०७८( २०८२) कार्यान्वयनमा छ।

सरकारले विश्व स्वास्थ्य संगठनको सहयोगमा कुष्ठरोगका कारण बिरामी परेका व्यक्तिलाई निःशुल्क औषधि उपलब्ध गराएको छ। नेपाल विश्व स्वास्थ्य संगठनको २३ वटा प्राथामिकता प्राप्त मुलुकमध्येमा परेको छ। विगत १० वर्षमा प्रत्येक वर्ष करिब २ हजार ८६७ नयाँ बिरामी दर्ता हुने गरेका सचिव देवकोटाले जानकारी दिए। ‘सन् २०२३ मा मात्र २ हजार ५२२ नयाँ बिरामी दर्ता भएका थिए। जसमा एक हजार ४९ जना अर्थात् ४२ प्रतिशत महिलाको सङ्ख्या थियो’ उनले भने।

यसैबीच, स्वास्थ्यमन्त्री प्रदीप पौडेलले कुष्ठरोग उन्मूलनका लागि नयाँ रणनीति निर्माण गरिने बताए। आज आयोजित ‘नेपाल कुष्ठरोग सम्मेलन’मा उनले सन् २०३० सम्म यो रोग उन्मूलनका लागि प्राथमिकता निर्धारण गर्दै आवश्यक रणनीति अख्तियारको आवश्यकता औँल्याए। मन्त्री पौडेलले यस सम्मेलनले अब बन्ने रणनीतिमा स्पष्टता ल्याउन सहयोग गर्ने विश्वास व्यक्त गरेका छन्।

धेरै संघसंस्थाको सहकार्यका बाबजुत उन्मूलन अभियानले तीव्रता लिन नसकेको स्वीकार गर्दै उनले त्यसका लागि कानूनी र सामाजिक दुवै पक्षमा काम गर्नुपर्नेमा जोड दिए। ‘हामीले प्राथमिकतालाई प्रभावकारी ढंगबाट अगाडि बढाउने गरी निर्धारण गर्न सकेका छैनौँ आवश्यक रणनीति अख्तियार गर्न सकिएको छैन’ मन्त्री पौडेल भन्छन्, ‘परिस्थिति बुझेर त्यसअनुरुपको योजना निर्माण भएको छैन, यस सम्मेलनले सन् २०३० सम्म यो रोग नेपालबाट सधैँका लागि उन्मूलन गर्ने संकल्प गर्न जरुरी छ। यहि संकल्पका साथ अघि बढौँ।’ 

साथै कुष्ठरोग उन्मूलनका लागि आवश्यक कानून निर्माणसँगै समाजमा जनचेतना अभिवृद्धिको पाटो महत्त्वपूर्ण भएको बताएका छन्। प्रभावितहरु समाजमा खुल्न नसक्दा उन्मूलनमा चुनौती देखिएकाबारे चर्चा गर्दै मन्त्रीले स्थानीय तहसँग समन्वय र सहकार्य आवश्यक पर्नेमा जोड दिए। मन्त्री पौडेलले मधेस प्रदेशमा प्रभावितको सङ्ख्या बढी देखिनुको कारण खोज्नुपर्ने र सोहीअनुरुप रणनीति बनाउने धारणा राखेका छन्। साथै दातृ निकायलाई प्राथमिकताका साथ बिरामीप्रति विश्वास दिलाउन सुझाव दिए।

‘पहिल्यै उन्मूलन भइसकेको भन्ने कुरा पनि आइरहेको छ फेरि यो समस्या किन देखियो भन्ने विषयसँग जोडेर त्यसअनुसारको रणनीति तय गर्नुपर्छ’ उनी भन्छन्, ‘यसको कानूनी पक्षबाट बाध्यात्मक स्थिति निर्माण गर्न सकिएन भने हामीले सामाजिक पक्षबाट जुन सहयोग खोजेका छौँ त्यो प्राप्त हुँदैन।’ मन्त्रालयका सचिवले देवकोटाले यो रोग उन्मूलनका लागि उच्चस्तरको राजनीतिक प्रतिबद्धताको आवश्यकता औँल्याए। उनले प्रभावित व्यक्तिको समावेशीकरण वृद्धि गर्ने उद्देश्यले सम्मेलन आयोजना गरिएको बताए।

सम्पूर्ण सहआयोजकको तर्फबाट आइएलइपी सदस्य शोभाखर कँडेलले प्रभावितमाथिको विभेद अन्त्य गर्न विद्यालयको पाठ्यक्रममा यसबारे शिक्षा दिनुपर्ने सुझाव दिएका छन्। नेपाल कानून समाजका अध्यक्ष एवं पूर्वउपसभामुख पुष्पा भुसालले कुष्ठरोगसँग जोडिएको मानव अधिकार, सामाजिक जागरण र वर्तमान कानूनको संशोधनको आवश्यकतामा जोड दिए। कार्यक्रममा सहआयोजकका तर्फबाट भुसालले प्रभावितमाथिको विभेद् अन्त्य गर्न राष्ट्रिय बहसको मुद्दा बनाउने उद्देश्यले यो सम्मेलन आयोजना गरिएको उल्लेख गरे।

पूर्वप्रधानन्यायाधीश कल्याण श्रेष्ठले कुष्ठरोगबाट नयाँ प्रभावित भेटिनु स्वास्थ्य क्षेत्र र समाजवादमा समस्या छ भन्ने संकेत गर्ने बताए। उनले प्रभावितहरूको सम्पत्ति, शिक्षा र समान अवसरमा पहुँच हुन नसकेको धारणा राखेका छन्। प्रतिनिधिसभाअन्तरगतको शिक्षा, स्वास्थ्य तथा सूचना प्रविधि समितिका सभापति अम्मरबहादुर थापाले प्रभावितलाई उपचारको व्यवस्थासँगै सम्मानपूर्वक बाच्न पाउने अवस्था सृजना गर्न सबैमा आह्वान गरे।

के हो कुष्ठरोग?

कुष्ठरोग छालामा फुस्रो दाग देखिने र छालाको वरिपरिको भागलाई नष्ट गर्ने प्रकारको सङ्क्रमण हो। उक्त रोगका कारण व्यक्ति शारीरिक रूपमा अपांग हुनसक्ने सम्भावना हुन्छ। यो रोग सहज रूपमा निको हुने र सबैभन्दा कम सर्ने भएपनि रोग लागेर निको भएका व्यक्ति अपमानको सिकार हुन बाध्य भएका छन्। शारीरिक रूपमा देखापर्ने असरका कारण कुष्ठरोगबाट पीडित अधिकांश व्यक्ति मानसिक रोगबाट गुज्रन परिरहेको मन्त्रालयका सचिव देवकोटाले बताउँछन्।

मानसिक रूपमा हुने डर, त्रास र भयका कारण व्यक्तिलाई समाजमा अस्वीकार नगर्ने, र नकारात्मक दृष्टिले हेर्ने संस्कारको अन्त्य हुनुपर्ने चिकित्सकहरू बताउँछन्। कुष्ठरोग एउटा शारिरिक समस्या मात्र नभई व्यक्तिको सामाजिक जीवनमा पनि असर पार्ने संक्रमणका रूपमा रहेको छ। रासस