बागलुङ- ‘एक निर्वाचन क्षेत्र, एक रणनीतिक सडक योजना’अन्तर्गत हरिचौर-मल्म-पाण्डवखानी सडकको स्तरोन्नति प्रारम्भ भएको छ। चालु आर्थिक वर्षमा ८ किलोमिटर स्तरोन्नति गरिने सडक डिभिजन कार्यालयले जनाएको छ।

संघीय सरकारबाट प्राप्त ४० करोड रुपैयाँ लागतमा स्तरोन्नति थालिएको हो। हालसम्म ७० प्रतिशत काम सम्पन्न भएको उक्त कार्यालयका इन्जिनियर सागर भण्डारीले जानकारी दिए। ८ किलोमिटरमध्ये ४ किलोमिटर कालोपत्रका लागि तयार भएको छ।

बाँकी भागमा सडक फराकिलो बनाउने, पानीको निकासका निम्ति नाली निर्माण, टोव पर्खाल लगाउनेलगायत काम जारी छ। यो सडक ४० किलोमिटर लामो छ। 

गलकोटको हरिचौरदेखि सुरु भएको सडक मल्म, पाण्डवखानी, रमुवा रणसिंहकिटेनी, भीमगिठे, दर्लिङ, निसीखोला हुँदै प्युठान जोडिन्छ। सडकको सुरु विन्दुबाट काम थालिएको हो। रासस