नवलपुर- शनिबार रातिदेखि निरन्तर परेको वर्षाका कारण पूर्वपश्चिम राजमार्गको नारायणघाट-बुटवल सडक अवरुद्ध भएको छ। विस्तारका क्रममा रहेको सडकको दाउन्ने क्षेत्रमा निरन्तरको वर्षाका कारण सवारीसाधन चिप्लिन थालेपछि सडक अवरुद्ध भएको हो।

जिल्ला प्रहरी कार्यालयका सूचना अधिकारी प्रहरी नायब उपरीक्षक मधु नेपालका अनुसार शिनबार रातिदेखि परेको पानीका कारण सडक चिप्लो भएको छ। सडक पूर्ण रूपमा अवरुद्ध भएको पछि यो सडक भएर यात्रा गर्नेहरूलाई वैकल्पिक सडक प्रयोग गर्नसमेत प्रहरीले आग्रह गरेको छ।

सडक विस्तारको कामलाई तीव्र पार्न दाउन्ने खण्डमा राति ११ देखि बिहान ५ बजेसम्म दैनिक सडक पूर्ण रूपमा बन्द गरिँदै आएको छ। रातिदेखि नै बन्द भएको यस सडकमा सवारीसाधनको लाइन लामो हुँदै गएको सूचना अधिकारी नेपालले जानकारी दिए।

कान्ति लोकपथ अवरुद्ध

त्यस्तै शनिबार रातिदेखि परेको अविरल वर्षाका कारण हेटौंडाबाट काठमाडौं जोड्ने कान्तिलोकपथ पनि अवरुद्ध भएको छ। वर्षाले मकवानपुरको भिमफेदी गाउँपालिका-८ र ललितपुरको बागमती गाउँपालिका-२ को सिमानामा रहेको बागमती खोला डाइभर्सन बगेपछि सडक अवरुद्ध भएको हो। डाइभर्सन बगाएपछि आइतबार बिहान ६ बजेदेखि कान्तिलोकपथ अवरुद्ध छ।

अहिले प्रहरी टोली खटेर अवरुद्ध सडक खुलाउने प्रयास जारी रहेको जिल्ला प्रहरी कार्यालयका प्रहरी नायब उपरीक्षक श्यामु अर्यालले जानकारी दिए। प्रहरीले  यात्रुलाई हेटौंडाबाट काठमाडौं जान अन्य  मार्ग प्रयोग गर्न आग्रह गरेको छ। रासस