कञ्चनपुर- बेलौरी नगरपालिका-६ का कृषक आसरेराम वडायक दश वर्षअघि वैदेशिक रोजगारीमा जाने योजनाका साथ काठमाडौं पुगेका थिए। काठमाडौंको एक ‘पोलिहाउस’ मा टमाटरखेती देखेपछि उनी स्वदेशमै खेती गर्ने योजना बनाएर फर्किए। काठमाडौंबाट टमाटरको बीउ लिएर कञ्चनपुर फर्किएका उनले त्यसयता विदेश जाने योजना बनाएका छैनन्।

'काठमाडौंबाट फर्किएपछि सुरुमा आधा कट्ठा जमिनमा तीनवटा पोलिहाउस बनाएर टमाटरखेती गरेँ', वडायकले विगत सम्झँदै भने, 'खेतीबाट फाइदा भएन, त्यसपछि तालिम लिएर खेती गर्छु भनेर भारतको पन्तनगर गएर दुई दिनको तालिम लिएँ।'

तालिमपछि खेतीमा लागेका वडायकले खेतीबाटै आम्दानी गरेर एक करोड रूपैयाँभन्दा बढीको कृषियन्त्र जोडेका छन्। उनी हाल वार्षिक २६ लाख रूपैयाँसम्म आम्दानी गर्छन्। उनले आफ्नो र भाडामा गरी नौ बिघा जग्गामा उखु, तोरी, मुसुरो र धानखेती जस्ता कृषि उपज उत्पादन गर्दै आएका छन्। वडायकले भने, 'खेती विस्तार गरेर वार्षिक एक करोड रूपैयाँसम्म कमाउने लक्ष्य राखेको छु।'

उनले खेतीका लागि अत्याधुनिक कृषि उपकरण भित्र्याएर काम गरिरहेको जानकारी दिए। उनले हालसम्म खेतीबाट प्राप्त आम्दानीले एक करोड रूपैयाँभन्दा बढी मूल्यका कृषियन्त्रहरु खरिद गरेका छन्। उनले भने, 'ड्रोनको प्रयोग खेतीमा सहज हुने भएकाले गत वर्ष मात्रै दश लाख रूपैयाँमा ड्रोन खरिद गरेको छु।'

उनले ड्रोनको प्रयोगबाट खेती गर्दा लागत कम हुनाका साथै उत्पादन समेत वृद्धि भएको बताए। उनले भारतका विभिन्न सहरमा व्यावसायिक खेतीको तालिम लिएका छन्। 'दुई वर्ष भारतको साझनपुरमा उखुखेतीसम्बन्धी तालिम लिएँ, महाराष्ट्रको साङ्लीमा व्यावसायिक खेतीको तालिम लिएर यहाँ आएपछि खेतीमा सजिलो भयो', वडायकले भने। 

उनका अनुसार ड्रोनले मानिसले भन्दा धेरै छिटो काम गर्छ यसबाट बिउबीजन र विषादीलगायत आवश्यक कीटनाषक औषधि छर्कने गरेका छन्। उनले भने, 'ड्रोनको प्रयोगले विषादी छर्किँदा मानिसले भन्दा राम्रो छर्किने र किसानको स्वास्थ्यमा विषादीले पनि असर गर्दैन।'

ड्रोनको प्रयोगले बीउबिजन र विषादी छर्किँदा थोरै लागतमा धेरै काम गर्न सकिने उनको भनाइ छ। उनलाई खेतीमा उनका परिवारका सदस्यहरुले समेत सहयोग गरेका छन्। उनले ‘सिजन’को बेला ३० देखि ४० जनालाई रोजगारी दिने गरेका छन्।

'सामान्य किसानले एक बिघा जग्गामा दुईदेखि तीन लाख रूपैयाँसम्मको उत्पादन गर्ने गरेकामा मैले एक बिघामा करिब १४ लाख रूपैयाँसम्मको उत्पादन गर्ने लक्ष्य लिएको छु,' वडायकले भने, 'प्राविधिक कुरामा मात्रै ध्यान दिन सके राम्रो उत्पादन हुन्छ।'

उनले उत्पादन गर्न सके बजारको समस्या भने नरहेको बताए। वडायक गत वर्ष सुदूरपश्चिम प्रदेश सरकारबाट प्रदेशकै सर्वोत्कृष्ट कृषकका रुपमा सम्मानित भएका थिए। भीमदत्त नगरपालिकाको उत्कृष्ट किसानबाट समेत उनी सम्मानित भइसकेका छन्। 'अहिले खेती गर्न थप सजिलो होस् भनेर मोबाइल ‘एप लन्च’ गर्ने तयारीमा छु', उनले भने, 'त्यो एपबाट कुन समयमा मल हाल्ने, कुन रोगबाट कसरी बच्नेलगायतका पूर्वजानकारी पाउन सकिन्छ।'

पछिल्लो समय कृषिमा प्रविधिको प्रयोग बढ्दै गएको छ। परम्परागत रुपमा गोरु र राँगा प्रयोग गरी जोत्ने ठाउँमा ट्याक्टर, मिनिटिलर, पावर टिलरको प्रयोग गर्न थालिएको छ भने बाली काट्न र पिस्न प्रविधिको प्रयोग भइरहेको छ। काट्नलाई ‘रिपर’, ‘बुस कटर’, ‘कम्बाइन हार्भेस्टर’लगायतका अत्याधुनिक उपकरणको प्रयोग बढ्दो छ। खेतबारी खनजोतमा सहज हुने भएपछि यान्त्रिकीकरणतर्फ किसान आकर्षित भएका हुन्। रासस