काठमाडाैं- नेशनल लाइफ इन्स्योरेन्सले सेयरधनीहरुका लागि लाभांश घोषणा गरेको छ। इन्स्योरेन्सले बिहीबार सेयरधनीलाई २० प्रतिशत लाभांश वितरण गर्ने घोषणा गरेको हो।

कम्पनीले आर्थिक वर्ष २०७६/७७ को नाफाबाट सेयरधनीलाई चुक्ता पुँजीको १९ प्रतिशत सेयर लाभांश र कर प्रयोजनको लागि १ प्रतिशत नगद लाभांश वितरण गर्ने प्रस्ताव गरेको हो। उक्त प्रस्ताव बुधबार बसेको इन्स्योरेन्स सञ्चालक समितिको बैठकले गरेको हो।

प्रस्तावित लाभांशलाई बीमा समितिले स्वीकृत तथा इन्स्योरेन्सको आगामी वार्षिक साधारण सभाले पारित गरेपछि सेयरधनीको खातामा आउने छ।

हाल इन्स्योरेन्सको चुक्ता पुँजी ३ अर्ब ३९ करोड रुपैयाँ रहेको छ। १९ प्रतिशत बोनस पारित पछि इन्स्योरेन्सको चुक्ता पुँजी ४ अर्ब रुपैयाँ नाघ्ने छ।

प्रस्तावित २० प्रतिशत लाभांश नेशनलले दिएको पछिल्लो तीन वर्षयताकै उच्च हो। आर्थिक वर्ष २०७२/७३ को नाफाबाट २६.३२ प्रतिशत (२५ प्रतिशत बोनस) लाभांश वितरण गरेको इन्स्योरेन्सले त्यसपछिका वर्षमा क्रमशः १३.५, १४.५ र १०.५३ प्रतिशत लाभांश वितरण गरेको थियो।