काठमाडौं- १० विकास बैंकहरूले चालू आर्थिक वर्षको ६ महिनाको वित्तीय विवरण सार्वजनिक गरेका छन्। जसमा मुक्तिनाथ, गरिमा, महालक्ष्मी, लुम्बिनी, शाइन रेसुङ्गा, ज्योति, कामना सेवा, सांग्रिला, मितेरी र सिन्धु विकास बैंक रहेका छन्। १० बैंकले ६ महिनामा ३ अर्ब २८ करोड ८२ लाख रुपैयाँ नाफा कमाएका छन्। 

विकास बैंकहरूमा ६ वटाको नाफा बढेको छ भने ४ वटाको नाफा घटेको छ। मितेरी, कामना सेवा, ज्याेति विकास र मुक्तिनाथ विकास बैंकबाहेक अन्यको खुद नाफा बढेको छ। 

सबैभन्दा बढी नाफा गर्नेमा मुक्तिनाथ विकास बैंक रहेको छ। बैंकले ६ महिनामा ६० करोड २४ लाख रुपैयाँ खुद नाफा गरेको छ। नाफा कमाउनेमा धेरै भएपनि गतवर्ष भन्दा घटेको छ।

मुक्तिनाथले २०७७ पुस मसान्तसम्ममा ६१ करोड ५५ लाख रुपैयाँ खुद नाफा आर्जन गरेको छ। प्रतिशतको दरमा सबैभन्दा बढी नाफा बढाउने सांग्रिला डेभलपमेन्ट रहेको छ। ४० प्रतिशतले नाफा बढाएको बैंकले २४ करोड ५१ लाख रुपैयाँ पुर्‍याएको छ। जुन गत आवको पुससम्ममा १८ करोड ७१ लाख रुपैयाँ थियो।

सिन्धु विकास बैंकले पुस मसान्तसम्ममा ३ करोड ५५ लाख रुपैयाँ नाफा कमाएको छ। प्रतिशतका आधारमा सबैभन्दा बढी नाफा घटाउनेमा कामना सेवा परेको छ। गत वर्षको तुलनामा बैंकको नाफा ११.९० प्रतिशतले घटेको छ।